بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ ایاز بلوچ ء اکبر کیچ ءِ ھند بلیدہ میناز ءِ جاہ منند اِنت 12 اکتوبر 2025 ءَ زور بیگواہ کنگ بیتگ۔ ھندی ھالانی رد ءَ آ چہ وانگجاہ ءَ گس ءَ آھگ ءَ بیتگ کہ میناز بازار ءِ نزیک ءَ پاکستانی پوج ءُ ریاستی پلہ مرزیں کشندہ ٹولی ءَ آوار جتگ ءُ بیگواہ کرتگ۔
آئی ءَ گوشتگ کہ 19 نومبر 2025 ءَ ایاز بلوچ ءِ ژانگولیں لاش چہ بلیدہ ءِ ھند ریکو ڈیمب ءَ دزکپتگ۔ چہ بازیں آزار دیگ ءُ گُٹ ءِ سڑگ ءِ سوب ءَ آئی دروشم پجارگ نہ بوتگ۔ کھول ءَ گُد ءُ چمپل پجارتگ اَنت کہ لاش ءِ کر ءَ بیتگ اَنت۔
آئی ءَ گوشتگ کہ ایاز بلوچ ءِ کوش بلوچستان ءَ ریاستی زوراکی ءُ انسانی ھکانی لگتمالی ءِ درچ ءَ پیش دار ایت کہ ایشی ءَ زوریں بیگواھی، درکانودی کوش، آزار دیگ ءُ لس شھریانی نشانگ کنگ ھوار اَنت۔ چہ ایشی ءَ استاد، نودربر، کارکن، زھگ ءُ جنین سانمند اَنت۔
آئی ءَ گوشتگ کہ بلوچستان ءَ گیش بیوکیں انسانی ھکانی بگیریانی سر ءَ میان استمانی تک ءَ زوت دلگوش دیگ ءُ کرد پیلو کنگ لوٹ ایت ءُ ایشی زمہ واراں جست بہ کنت ءُ سانمندیں کھولانی گون ءَ انساپ کنگ بہ بیت۔
