شال: بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹر دین مھمد جنک سمی دین ءَ شال ءَ وش آتک ءَ آتکگیں مردمانی مچی ءَ تران کرتگ ءُ گوشگ کہ ھما مردماں ھمے گوشتگ کہ چہ اسلام آباد ءَ واتر بلوچستان ءَ روگ مئے پروش اِنت یا بے اوستی اِنت آ وتی چمان پچ بہ کن اَنت پچار اَنت مئے مردماں مارا کجام وڑ ءَ مھر داتگ ءُ شرپ بکش اِتگ ما آیانی باز باز منتواریں۔
آئی ءَ گوشتگ کہ ما نادیستگیں زوراکاں ھمے گوشگ لوٹ ایں کہ اے ما کٹ اِتگ مردمانی زور مئے سوبمندی اِنت۔ ما چہ وتی مردمانی زور ءَ ریاست ءَ لٹ شاپ ءُ بلوچ چکچینی ءِ شونداتانی دیم پہ دیمی ءَ کن ایں، چہ مردمانی زور ءَ ما وتی آزیزاں آجو کن ایں۔
سمی دین ءَ گوشتگ کہ ما دست ھالیگ ءَ چہ اسلام آباد ءَ بلوچستان ءَ نہ یتکگیں بلکیں ریاست ءِ زوراکیانی کسہ نبشتہ کرتگ ءُ آتکگیں۔ اے لس مردمانی مچی تئی ریاست ءِ ناشرکاری ءُ زوراکیانی بگیری ءَ درکپتگ۔ مئے جھد چہ اسلام آباد ءَ ھلاس نہ بوتگ اے جھد نوکیں رنگے ءَ بندات بوتگ۔
آئی ءَ گوشتگ کہ ما 27 جنوری ءَ چہ ایشی مستریں مچی یے ءِ اوست ءَ دار ایں۔ ھمے وڑ ءَ مردم گوں زرمبشت ءَ ھمگرنچ بہ بنت آ روچ دور نہ اِنت ما چہ ریاست ءِ زندان ءَ وتی مردمانی کشگ ءَ سوبیں بہ بہ ایں۔
سمی دین ءَ گڈی ءَ پشتون ءُ ھزارھانی منت گپتگ کہ آ اے جھد ءِ میان ءَ مئے گون ءَ ھمگام بوتگ اَنت۔
