بلوچ راجدوستیں سروک ءُ بلوچ نیشنل موومنٹ ( بی این ایم ) ءِ پیشیگیں چیئرمین ھلیل بلوچ ءَ بلوچ شھیدانی سالروچ ءِ درگت ءَ وتی شنگ کرتگیں درشانے ءَ گوشتگ کہ سیزدہ نومبر بلوچ راجءِ ھواری ءَ اھد کنگ ءِ روچ اِنت۔1839 ءَ ھان کلات ءِ شھیدی ءَ ھمے گپ گو ستانک ءِ تاکدیماں پہ مدامی نکش کرتگ کہ زورگر ءِ توپ ءُ شورہ تھنا جان ءَ تاوان دےاَنت یک راجے ءِ جوزگ ءَ نہ ۔ آ روچ بلوچ گھگیری ءِ بنداتی نبشتانک بیتگ کہ آئی سر ءَ ھونانی رژنائی مرچی ھم نوک اِنت۔
آئی ءَ گوشتگ کہ اے روچ مارا ھمے ترانگ ءَ دنت کہ مئے شھید تھنا گوستءِ کسہ نہ اَنت بلکیں مئے باندات ءِ ھاٹیگ اَنت۔ مرچی ھم زوریں بیگواھی، ژانگولیں لاش ءُ چہ پوج ءِ زوراکیاں سدانی کچ ءَ مات وتی زھگانی وداریگ اَنت۔ گڑا مارا سیزدہ نومبر ھمے گوش ایت کہ اے درچ چہ 1839 ءَ بندات بیتگ ءُ داں مرچی برجاہ اِنت۔ بلے بلوچ راج ءَ پروش نہ وارتگ۔
ھلیل بلوچ ءَ گوشتگ کہ سیزدہ نومبر اھد ءِ روچ اِنت۔ اے روچ مارا ھمے گوش ایت کہ ما وتی شھیدانی واماں گوں راجی ھستمان، وتی سرڈگار ءُ وتی آجوئی جنگ ءِ برجاہ دارگ ءِ دروشم ءَ پیلو کن ایں۔ بلوچانی زور ھما شھید اَنت ءُ شھیدانی زور ھما راستی اِنت کہ آ چہ چونیں ھم توپ، چونیں ھم ٹینک ءُ چونیں ھم چہ آزرادھی ءَ دارگ نہ بیت۔
