بلوچ یکجھتی کمیٹی ءِسروک سمی دین ءَ کراچی پریس کلب ءِ دیمءَ زور بیگواھیں گنی امان ءِ کھول ءِ نیمگ ءَ برجاھیں زھرشانی نندانکءَ تران کرتگ ءُ گوشتگ کہ بلوچستان ءَ ھوار سند ءُ آدگہ استاناں پہ سیاسی توارانی دارگ ءَ زوریں بیگواھی ءُ دروگیں میڑاں کوش گوں ترندی ءَ برجاہ اِنت۔
آئی ءَ گوشتگ کہ من وت بلوچستان ءِ جاہ منند آں ءُ اود ءَ ھم ھما کہ زوراکی بیتگ اَنت بلکیں درشان کنگ نہ بنت۔ مئے ھمے سال ءَ گوستگیں دہ ماھانی میان ءَ ھزارانی کچ ءَ مردم بیگواہ کنگ بیتگ اَنت۔ گوستگیں دہ ماھانی زوریں بیگواھی ءَ مردم بہ چار ایت گڑا زانت کہ بلوچستان ءِ زوریں بیگواھی کجام کساس ءَ برجاہ اِنت۔
سمی دینءَ گوشتگ کہ وھدے ما سند ءَ چار ایں گوستگیں سے روچ بیت کہ گنی اھمد چانڈیو زور بیگواہ کنگ بیتگ۔درساں مستریں ملامتی ءِگپ ایش اِنت کہ گنی امان گوں وتی کھول ءَ پہ الاج ءِ نیت ءَ اتکگ آئی چہ آزار دیگ ءَ پد زور بیگواھی نہ تھنا درانسانی ءُ در راھبندی کارے بلکیں یک شرم ءِ گپے اِنت۔
آئی ءَ گوشتگ کہ من چہ وتی گل بلوچ یکجھتی کمٹی ءِ نیمگءَ پہ یکجھتی کنگ ءَ اتکگ آں ءُ بلکیں اے کلوہ ءَ داں درسیں نزوریں راجاں سر کنگ لوٹ آں۔
