لندن: برتانیہ پارلیمنٹ ءَ بلوچ آرٹسٹ سنجی بلوچ ءِ جوڑ کرتگیں یک اکسے ءِ پیش کنگءِ میانءَ زرمبش ٹی وی ءِ جھگیر جاسم بلوچ ءَ گوں برتانیہ پارلیمنٹ ءِ باسک ایم پی جان میک ڈونلڈ ءِ گون ءَ آئی کارگس ءَ گپ ءُ تران کرتگ۔
سنجی بلوچ ءَ چہ وتی ازم ءَ بلوچستان ءِ انوگیں جاور، انسانی ھکانی لگتمالی ءُ گوں بلوچ مھلوکءَ پیش بیوکیں جیڑہ پیش کرتگ اَنت۔ اے اکس پہ جان میک ڈونلڈ ءَ یکجھتی ءَ پیش کنگ بیتگ۔
ایم پی جان میک ڈونلڈ ءَ ھمے درگت ءَ سنجی بلوچ ءِ ازم ساڑاتگ ءُ آئی منت گپتگ ءُ بلوچستان ءَ انسانی ھکانی پادمالیانی سر ءَ بژن درشان کرتگ۔ آئی ءَ زھری ءَ پاکستانی پوج ءِ زوراکیانی آسر ءَ کودکیں زھگانی ناھکیں کوش ایر جتگ۔
جان میک ڈونلڈ ءَ ڈاکٹر ماہ رنگ بلوچ ءُ آدگہ زور بیگواھی کارکنانی بابتءَ بژن درشان کرتگ ءُ بلوچ نیشنل موومنٹ ءِ باسک زبیر بلوچ ءِ درکانودی کوش ھم گوں ترندیں دانکاں ایر جتگ۔
آئی ءَ گوں میان استمانی تک، برتانیہ سرکار ءُ میان استمانی انسانی ھکانی ادارھانی گون ءَ لوٹ کرتگ کہ آ بلوچستان ءَ برجاھیں انسانی ھکانی بگیریانی سر ءَ دلگوش گور بہ کن اَنت ءُ پاکستان ءَ زور بدے اَنت کہ آ گوں بلوچاں انساپ بہ کنت۔
اے بابت ءَ زرمبش ٹی وی ءِ جھگیر جاسم بلوچ ءِ رد ءَ اے گند ءُ نند نہ تھنا پہ اکس ءِ پارست ءَ توار چست کنگ بیتگ بلکیں پہ استمانی تک ءَ بلوچستان ءِ جیڑہ ءِ آشکار ءَ جوانیں گامگیجے بیتگ۔
سنجی بلوچ بلوچستان ءِ یک باز جوانیں آرٹسٹے کہ آ چہ وتی ازم ءِ پارست ءَ مدام بلوچستان ءِ زبیائی ءُ گوں بلوچ مھلوک ءَ بیوکیں زوراکیاں پیش کنگ ءَ اِنت۔
