بلوچستان لبریشن پرنٹ (بی ایل ایپ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں 28 اکتوبر ءِ سھب ءِ ادار ھشت ءِ نزیک ءَ کیچ بلیدہ ءِ ھند ریکورونگان ءَ زورگریں پاکستانی پوج ءِ سے موٹر سائیکل ءَ سواریں کارمندانی سر ءَ سنگر گپتگ ءُ اُرش کرتگ۔ چہ ایشی آسر ءَ سے کارمند جاھی مرتگ ءُ یکے سک ءَ ٹپی بوتگ۔
آئی گوشتگ کہ اُرش ءَ پد سرمچاراں مرتگیں کارمندانی سلاہ ءُ آدگہ پوجی سامان دستیگ کرتگ ءُ شوربندی ءِ بنیاد ءَ آپریشن ءِ سرجم کنگ ءَ پد پہ سلامتی وتی بندراں شتگ اَنت۔
آئی گوشتگ کہ بی ایل ایپ ءِ سرمچار یک مھکمیں جنگی شوربندی یے ءِ رد ءَ شھر ءُ کوھی دمگاں یکشل ءَ دژمنیں پوج ءِ سر ءَ اُرش کنگ ءَ اَنت۔چہ ایشی آسر ءَ دژمنیں پوج سسائی نادراھی ءِ دیمپان اِنت۔ آئی پروش وارتگ کہ آ پہ وتی پوجیانی توکل ءِ مھکم کنگ ءَ وتی مرتگیں کارمنداں چیر دیگ ءُ بے میاریں شھریاں آوار جنگ ءُ دروگیں میڑاں کشگ ءَ اِنت۔
میجر گھرام بلوچ ءَ پاکستانی پوج ءِ کارمندانی کوش ءُ سلاھانی دستیگ کنگ ءِ زمہ واری من اِتگ ءُ گوشتگ کہ داں بلوچستان ءِ آجوئی ءَ دژمن ءِ سر ءَ اُرشانی برجاہ دارگ ءِ کول ءَ کن ایں۔
