کیچ: بلیدہ ءُ زامران ءِ مردماں سیمسر ءِ بندی ءُ دمگ ءَ ناشریانی بگیری ءَ بلیدہءَ زھرشانی کرتگ۔ زھرشانی روانک چہ شھید ایوب بلیدی چاراہ ءَ بندات بوتگ تر ءُ گرد کنان ءَ شتگ ءُ بٹ ءَ مچ بوتگ اَنت۔ زھرشانی روانک ءَ مردماں بازیں کچے ءَ بھر زرتگ۔
زھرشانی ءَ مردماں تران کرتگ ءُ گوشتگ کہ بلیدہ ءُ زامران ءِ جاور سکا ناگیگ اَنت ھمک روچ دزی ءُ ڈنگی ورنایانی بیگواھی ءُ نشانگ کنگ ءُ کشگ یک دودے جوڑ بوتگ۔ دز ءُ ڈنگ شھدگ ءُ دمکاں مردماں پُل اَنت۔ بلے انتزامیہ ءُ آدگہ ادارہ بے توار اَنت ءُ چارگ ءَ اَنت۔ سرکار ءِ زور ھلاس بوتگ کہ مردم وتی گساں ھم پھریز نہ اَنت۔
تران کنوکاں گوشتگ کہ بلیدہ ءُ زامران ءِ مھلوک ءِ کار ءُ روزگارگوں ابدوئی ءُ آدگہ سیمسراں بندوک اَنت۔ بلے لھتیں ماہ اِنت کہ سیمسر ءِ بندی ءَ مردماں مالی تاوان بوتگ۔ روزگار ءِ در بند کنگ بوتگ اَنت، لاچاریں مردم وتی کھولانی والینگ ءَ سکا جنجال اَنت
آیاں گوں سرکار ءَ لوٹ کرتگ کہ بلیدہ ءُ زامران ءَ پہ مردمانی پھریزگ ءَ گامگیج بہ زور ایت ءُ سلکاریاں ھواریں مردمانی بگیری ءَ کاروائی بہ کنت۔ سیمسر زوت پچ کنگ بہ بیت دانکہ مردم کار کرت بہ کن اَنت۔
آیاں گوشتگ کہ اگاں سرکار ءَ اے دوئیں جیڑھ سیسمر ءِ بندی ءُ ناشرکاری ءِ جیڑہ گیش ءُگیوار کنگ ءَ گامگیج نہ زرت گڑا ما وتی زھرشانی ءَ گیش ترند کن ایں۔
