لندن: بلوچ نیشنل موومنٹ ( بی این ایم ) ءَ ھزادر ءِ ھند زھریءَ پاکستانی پوج ءِ زوراکیانی بگیریءَ زھرشانی کرتگ کہ اے زھرشانی ءَ بی این ایم باسک ءُ دوزواھاں بازیں کچے ءَ بھر زرتگ۔
زھرشانی کنوکیں مردماں بینر ءُ پلے کارڈ دستاں بیتگ کہ آیانی سر ءَ پاکستانی پوج ءِ زوراکیانی بگیری ءَ جتا جتائیں اوگام نبشتہ بیتگ ءُ آیاں چہ میانی استمانی ادارھاں پہ اے زوراکیانی دارگ ءَ زوتیں دزمانجی کنگ ءِ لوٹ کرتگ۔
آیاں تران کرتگ ءُ گوشتگ کہ بلوچستان ءَ لس شھری بزاں جنین ءُ زھگ نشانگ کنگ بوگ ءَ اَنت ما اے وڑیں زوراکیاں ھچ وڑ ءَ اوپار کرت نہ کن ایں۔ بلے میان استمانی انسانی ھکانی ادارہ بلوچستان ءَ بیوکیں درسیں ریاستی زوراکیانی گندگ ءَ ابید انگت ءَ بے توار اَنت۔
زھرشانی کنوکیں مردماں گوں اکوام متھدہ ءَ ھوار درسیں انسانی ھکانی ادارھاں لوٹ کرتگ کہ آ بلوچستان ءَ بیوکیں پاکستان ریاست ءِ زوراکیانی بابت ءَ دزمانجنی بہ کن اَنت ءُ پہ پاکستان ءِ زوراکیانی بابتءَ پٹ ءُ پول بہ کن اَنت۔
