شال: چہ ھزادر ءَ پاکستانی پوج ءِ دست ءَ زور بیگواھیں گنی بلوچ ءِ کھول ءَ چہ شال پریس کلب ءَ پریس کانپرنس کرتگ ءُ گوشتگ کہ مئے کھول ءَ گوستگیں یک سد ءُ چل ءُ پنچ روچ بیت کہ گوں جنجالاں زند گوزینگ ءَ اِنت۔ ما مرچی پد ءَ پہ ھمے اوست ءَ اتکگ ایں شما پہ گنی بلوچ ءِ آجوئی ءَ وتی کرد ءَ پیلو کن اِت۔
آئی ءَ گوشتگ کہ گنی بلوچ 25 مئی 2025 ءَ بیگواہ کنگ بیتگ داں مرچی بیگواہ اِنت چہ ھما روچ ءَ داں مرچی ما کانودی لوٹ پیلو کرتگ اَنت ءُپہ گنی بلوچ ءِ آجوئی ءَ درسیں در ٹک اتگ اَنت۔ پولیس تانہ ءُ آمیدگس ءَ ھم شتگ ایں۔ داں مرچی ءَ یک دارھے ءَ نہ گوشتگ کہ گنی کج ءَ ءُ کئی کِر ءَ اِنت۔ ھزدار ءِ آمیدگس ءَ کیس کش اتگ۔
آئی ءَ گوشتگ کہ ما ھمے سرپد ایں گنی بلوچ ءِ زوریں بیگواھی تھنا کھول ءِ جنجال نہ اِنت بلکیں ڈیھ ءِ آئین ءِ بگیری اِنت، چی ءَ کہ اے ڈیھ ءِ آئین ھمک شھری ءِ زندگی ءُ ھک ءِ پھریزگ ءِ مانزمانی ءَ دنت۔ آئین ءِ رد ءَ چونیں ھم مردمے ءِ دزگیری ءَ پد آمیدگس ءَ پیش کنگ بہ بیت ءُ آئینءِ رد ءَ جست ءُ پرس کنگ ھژدری اِنت۔
آئی ءَ گوشتگ کہ گنی بلوچ ءِ بیگواھی ءَ چار ماہ ءِ گوزگ ءَ ابید آ نہ آمیدگس ءَ پیش کنگ بیتگ ءُ نہ اے ھم گوشگ بیتگ کہ کج ءَ اِنت۔ اے آئین ءُ کانود ءِ رد ءَ دوئیں ھساب ءَ زوراکی یے۔ ما آئی اے بیگواھی ءِ روچانی میان ءَ آمیدگس ءَ روگ ءِ ھواری ءَ دگانی سر ءَ زھرشانی ھم کرتگ بلے مارا ھچ جاہ ءَ پسو دیگ نہ بیت۔
آئی ءَ گوشتگ کہ ما انساپ لوٹ این ءُ ما ھمے گوش ایں کہ گنی بلوچ آمیدگس ءَ پیش کنگ بہ بیت، آئی سر ءَ چونیں بھتامے ھست کانود ءِ رد ءَ کاروائی کنگ بہ بیت۔
آئی ءَ گوشتگ کہ ما گوں اھوالکار، آمیدگس ءُ سرکار ءَ لوٹ کن ایں کہ اے زوراکی ءِ بگیری ءَ توار چست بہ کن اَنت۔ ما تھنا انساپ ءُ گنی بلوچ ءِ آجوئی ءَ لوٹگ ءَ ایں۔ دانکہ گنی بلوچ آجو نہ بیتگ ما بے توار نہ بہ ایں۔
