ھزدار: زھری ءَ پاکستانی پوج ءِ نیمگ ءَ زوراکی برجاہ اِنت، چہ ڈرون اُرش ءَ پنچ مردم بیران ءُ سے ٹپی بوتگ۔
اھوالکار ءِ رد ءَ پنچ اکتوبر ءَ زھری ءِ ھند مولہ پس بیل جاڑی ءَ پاکستانی پوج ءِ ھیلی کاپٹراں تیرگواری کرتگ ءُ ڈرون ءَ بمبگواری کرتگ کہ چہ ایشی آسر ءَ کم چہ کم پنچ مردم جاھی بیران بوتگ ءُ سَے ٹپی بوتگ۔ چہ بیران بوتگیں مردماں دو مردم ءِ نام منزور اھمد ء ابدُلھکیم ، بی بی رھیمہ اِنت ءُ دگہ سے زھگ اَنت۔
زھری ءِ ھند نورگامہ ءَ گوستگیں روچ ءَ پاکستانی پوج ءِ تیرگواری ءَ ورنایے ٹپی ءُ آ پہ الاجءَ نادراھجاہ ءَ برگ بوتگ بلے نیم راہ ءَ آئی ٹپانی درد نہ سگ اِتگ ءُ بیران بوتگ۔
چہ ایشیءَ پیش یک اکتوبر ءَ زھری ءِ ھند تراسانی ءِ نزیک ءَ ڈرون اُرش ءَ بی بی آمنہ، لال بی بی ءُ مھمد ھسن ء مھمد یاکوب بیران ءُ یک چار سالی ئیں زھگے ءَ ھوار پنچ مردم ٹپی بوتگ اَت۔
ھمے وڑ ءَ زھری ءِ کوھی دمگاں پاکستانی پوج ءِ بالی گراباں بمبگواری کرتگ کہ بمبگواریاں باز شھریانی بیرانی ءِ ھال اِنت۔ دمگ ءَ چہ نیٹورک ءُ راھانی بندی ءِ سوب ءَ انگت ءَ سرجمیں ھال سر نہ بوگ ءَ اَنت۔
