شال: بی ایس او ءُ بی ایس او پجار ءِ نیمگ ءَ شھید چیئرمین زبیر بلوچ ءُ شھید نسار بلوچ ءِ یات ءَ دیوانے برجم دارگ بیتگ کہ بی ایس او ءِ سروک ءُ کارکناں ھوار جتائیں پارٹیانی سروک ءُ باسکاں بازیں کچے ءَ بھر زرتگ۔
آیاں شھید ستک شانی ندر کرتگ اَنت ءُ گوشتگ کہ شھید زبیر بلوچ راھبند دوست ، پرایمنیں ءُ نہ ترسیں کارکنے بیتگ کہ آ پہ بلوچ راجی بنکی ھک ءُ انساپ ءَ جھد کنگ ءَ بیتگ۔ آئی نہ تھنا درکانودی کوش ءُ زوریں بیگواھی ءُ ریاستی زوراکیانی بگیری ءَ توار چست کرتگ بلکیں پہ بلوچ نودربر ءُ لس مھلوک ءَ سرپد کنگ ءَ مزنیں کردے پیلو کرتگ۔
آیاں گوشتگ کہ شھید زبیر بلوچ پہ زانت یک پندلے ءِ بنیاد ءَ نشانگ کنگ بیتگ دانکہ پہ بلوچ راج ءِ ھکاں چست بیتگیں توار دارگ بہ بیت۔ ما آئی شھیدی ءَ درکانودی کوشے لیک این ءُ ریاست ءِ پندلاں رد کن ایں کہ آورنایانی کرد جھد ءُ لیکہ ءَ نزور کنگ ءِ جھد ءَ کنگ ءَ اِنت۔
آیاں گوشتگ کہ شھید زبیر بلوچ ءِ زندگی ءُ دیمونی پہ بلوچ راج ءَ یک مادنیں کشکے ءَ منانک اَنت کہ آ زوراکیانی بگیری ءَ مڑگ ءِ سکین ءَ دے اَنت۔
آیاں گوشتگ کہ ھمے وڑ ءَ شھید نسار جان براسو بلوچ ءَ پہ بلوچ راجی ھکاں وت ءَ ندر کرتگ کہ آ مدام پہ بلوچ راجی ھمسنتی ءُ انساپ ءَ جھد کرتگ۔ آئی دیمونیاں ستک شانی ندر کن ایں۔
آیاں گوں بلوچ نودربر، سیاسی کارکن ءُ درسیں بھرگاں سیادی داروکیں مردماں لوٹ کرتگ کہ آ شھیدانی کاروان ءَ دیم ءَ بہ بر اَنت ءُ زوراکیانی بگیری ءَ توار چست بہ کن اَنت ءُ پہ بلوچ راج ءِ ھکاں وتی کرد ءَ پیلو بہ کن اَنت۔
