بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ ایکس ءَ زور بیگواھیں بلوچ نودربر سروک شبیر بلوچ ءِ بابت ءَ وتی شنگ کرتگیں درشانے ءَ گوشتگ کہ شبیر بلوچ 4اکتوبر 2016 ءَ چہ کیچ ءِ ھند گورکوپ ءَ پاکستانی پوج ءَ آوار جتگ ءُ بیگواہ کرتگ۔ چہ ھما روچ ءَ داں مرچی آئی کھول گوں رنجاں دیمپان اِنت۔
ڈاکٹر نسیم بلوچ ءَ گوشتگ کہ شبیر بلوچ ءِ میار تھنا ھمیش اِنت کہ آ پہ بلوچ راجءِ ھک ءُ آجوئی ءِ جھد کنگ ءَ بیتگ۔
آئی ءَ گوشتگ کہ شبیر بلوچ ءِ گھار سیما بلوچ ءُ لوگبانک زرینہ بلوچ نُھ سال اِنت کہ گوں درد ءُرنجاں جھد کنگ ءَ اَنت۔ آیاں پہ شبیر ءِ آجوئیءَ روانک کش اتگ، زھرشانی کرتگ، گرم ءُ سارتی ءَ زھرشانی نندانک ءَنشتگ اَنت ءُ پہ شبیر بلوچ ءِ آجوئی ءَ لوٹ کرتگ۔
ڈاکٹر نسیم بلوچ ءَ گوشتگ کہ ھمک سال نہ تھنا زوریں بیگواھیءِ زوراکی ءِ یات ءَ دنت بلکیں بلوچ کھولاں ھمت ءُ توکل دنت ءُ آیاں بے توار بوگ ءَ نیل ایت۔
آئی ءَ گوشتگ کہ شبیر بلوچ ءِ کیس گوں ھزارانی کچ ءَ بلوچ کھولانی رنجاں یکے کہ آ اوست ءُ بے اوستی ءِ میان ءَ ودار کنگ ءَ اَنت۔ شبیر بلوچ ءِ زوریں بیگواھی ءِ نُھ سال یک مردمے ءِ گپ نہ اِنت بلکیں یک راجے ءِ درداں پیش دار ایت کہ آ یک زورگپتےءِ چیردستیءَ زند گوزینگ ءَ اَنت ۔
