بلوچ راجدوستین سروک رھیم بلوچ ایڈوکیٹ ءَ وتی شنگ کرتگیں درشانے ءَ گوشتگ کہ مزپر آباد ءَ ھوار پاکستان ءِ زورگپتیں کشمیر ءَ اوامی ایکشن کمیٹی ءِ زھرشانی ءِ سر ءَ زورگریں پاکستانی پوجءِ زوراکی آزاردھی ءُ کارکنانی شھیدی دمگءَ پاکستان ءِنوک آبادکاریں زوراکیاں پاشک کنت۔ کشمیر ءَ ریاست ءِ انوگیں زوراکیاں ایر جن آں۔
آئی ءَ گوشتگ کہ کشمیری مھلوک اے راستی ءَ بے ھال نہ کنت کہ آیانی اےجنت گونگیں دمگ ءَ پاکستان چہ وتی کارانی آسر ءَ نہ بلکیں 22 اکتوبر 1947 ءَ پاکستان ءِ زوراکی، کشت ءُ کوش، لٹ ءُ پل ءُ نوک آبادکاریں زورگپتی ءِ رد ءَ پاکستان کشمیر ءِ سر ءَ زورگپت بیتگ۔ اے ھم پاکستان اَت کہ پہ پنجاپ ءِ آپ ءَ کشمیر ءِ دستیگ کنگ ءَ اشتاپ اَت ءُ کشمیری مھلوک پہ وتی راجی باندات ءِ پیسلہ ءَ موہ نہ دات ءُ زوراکی کرت۔
رھیم بلوچ ایڈوکیٹ ءَ گوشتگ کہ کشمیری مھلوک پاکستان ءِ نوک آبادکاریں زورگپتی ءَ سرپد اِنت، آیانی پہ وتی راجی دودمان، سرڈگار ءُ مڈیانی واھندی ءِ ھک ءُ آجوئی ءَ چست بیتگیں زانت پہ دمگ ءِ درسیں راجاں نیکیں پالے۔ کشمیری مھلوک مزنیں کچے ءَ گوں نہ ترسی ءُ زانت ءَ دیم ءَ پیداک اَنت۔
آئی ءَ گوشتگ کہ نوں مسلمانی ءِ دروگیں اوگام ءِ میانءَ پنجاپی ءِ زورگری ءِ کشمیر ءَ دیم ءَ برجاہ دارگ پہ پاکستان ءَ ارزان نہ اِنت۔ من کشمیر ءِ نہ ترسیں مھلوک ءُ شھیداں پہ آیانی ھک ءَ اے توکلیں جنگ ءَ دروت ندر کن آں۔
