چہ بلوچستان ءَ ریاستی زوراکیانی آماچیں کھولانی زھرشانی نندانک ءَ اسلام آباد ءِ دگانی سر ءَ شست ءُ چار روچ سرجم بیتگ کہ انگت برجاہ اِنت۔دو ماہ ءِ گوزگ ءَ ابید ھمے چہ سرکار ءِ نیمگ ءَ پہ آیانی لوٹانی منگ ءَ ھچ وڑیں گامگیج زورگ نہ بیتگ۔
اے زھرشانی نندانک ءَ چہ بلوچستان ءِ جتائیں ھند ءُ دمگاں بی وائی سی ءِ سروک ءُ زور بیگواھیں مردمانی کھول ھوار اَنت۔
آیانی لوٹ ھمیش اَنت کہ بلوچ یکجھتی کمیٹی ءِ بندیگیں سروک یل کنگ بہ بنت۔ زور بیگواھیں مردم آمیدگس ءَ پیش کنگ یا آجو کنگ بہ بنت ءُ بلوچستان ءَ چہ ریاستی ادارھانی نیمگ ءَ زوریں بیگواھی بند کنگ بہ بنت۔
اے دو ماہ ءَ گیش زھرشانی نندانک ءَ آیاں ھور ءُ موسم ءِ ھرابی ءَ ابید چہ اسلام آباد انتزامیہ ءِ نیمگ ءَ زوراکی دیستگ اَنت بلے انگت ءَ وتی لوٹانی سر ءَ اوشتاتگ اَنت۔
آیانی گوشگ اِنت دانکہ مئے لوٹ منگ نہ بنت مئے زھرشانی نندانک برجاہ بیت۔
