بلوچ یکجھتی کمیٹی (بی وائی سی) ءَ وتی شنگ کرتگیں درشانے ءَ گوشتگ کہ زوربیگواھی ءِ درد پہ کھولاں جانی ءُ سسائی جنجالے جوڑ بوتگ۔
آئی گوشتگ کہ زوربیگواھی ءِ بگیری ءَ زھرشانی کنوکیں زاھد الی ءِ پت ءِ نانگت ءَ جاورانی ناگیگ بوگ ءِ سوب ءَ مرچی ھم زھرشانی گدان دارگ بوتگ۔ اے زھرشانی گدان مرچی 42 می روچ ءَ بوگی بوتگ۔
بی وائی سی ءِ گوشگ اِنت کہ زاھد الی کراچی زانشجاہ ءَ بین الاکوامی ءِ نودربر ے آئی امر بیستءُ پنچ سال اِنت کہ آ 17 جولائی 2025 ءَ چہ لیاری ءَ گوں رکشہ ءَ ھوار زوربیگواہ کنگ بوتگ۔ زاھد الی ءِ زوریں بیگواھی ءِ بگیری ءَ کھول ءَ کراچی ءَزھرشانی گدان جتگ اَت کہ داں 40 روچ ءَ برجاہ بوتگ۔
آئی ءَ گوشتگ کہ زاھد ءِ پت چہ نادراھی ءَ ابید زھرشانی نندانک ءِ سروکی ءَ کنگ ءَ بیتگ، انگت ءَ آئی جاور ناگیگ بیتگ چہ ھمے سوب ءَ زھرشانی نندانک دو روچ اِنت کہ ھلاس بیتگ۔
آئی گوشتگ کہ اے جنجال ھمے راستی ءَ پیش داریت کہ زوریں بیگواھی تھنا یک مردمے ءِ سر ءَ نہ بلکیں سرجمیں کھول ءَ ھم جنجال کنت۔
آئی گوشتگ کہ کھول گوں تکانسریں جاوراں زند گوازینگ ءَ لاچار اَنت ءُ چہ وتی وس ءُ واک ءَ پہ انساپ ءَ توار چست کنگ ءَ اَنت۔
کھول ءُ بی وائی ءَ یکبرے پد ءَ لوٹ کرتگ کہ زاھد الی ءَ ھوار درسیں بیگواھیں مردم آجو کنگ بہ بنت۔
