بلوچ یکجھتی کمیٹی ءِ سروک سمی دین ءَ اسلام آباد زھرشانی ءِ دوماہ سرجم بوگ ءِ بابت ءَ ماں چاگردی رسانکدر ءَ نبشتگ کہ مرچی اسلام آباد ءَ بلوچ کھولانی زھرشانی نندانک ءَ دو ماہ سرجم بیتگ۔بلوچستان ءَ مزنیں کچے ءَ دراجکشیں زھرشانیانی منانک ھست اَنت۔ 2010 ءَ زور بیگواھیں مردمانی کھولانی نیمگ ءَ چہ شال ءَ اسلام آباد ءِ روانک بہ بیت، 2013 ءِ پیادگیں روانک بہ بیت کہ چہ شال ءَداں کراچی ءُ اسلام آباد ءَ سے ماہ ءُ ھشت روچ سرجم بیتگ۔ 2021 ءَ اسلام آباد ڈی چاراہ ءِ نندانک، 2022 ءَ شال ریڈزون ءَ داں پنجاہ ءُ پنچ روچ ءَ نندانک، 2023 ءِ روانک داں ماھے ءَ گیش اسلام آباد ءَ برجاہ بیتگ، وائس پار بلوچ مسنگ پرسن ءِ شدکشیں زھرشانی ءَ مرچی 5938 روچ سرجم بیتگ۔
آئی ءَ گوشتگ کہ بلوچاں گوں پرایمنیں زھرشانی ءُ جھد ءِ پارست ءَ وتی لوٹ پیش کرتگ اَنت۔ بلکیں پاکستان ءِ چونیں ھم راجے ءَ انچو یکشل ءَ مزنیں زھرشانی نہ کرتگ۔ چہ ایشی ءَابید مارا بھتام جنگ بیت کہ ما سیاسی مردم نہ ایں ءُ مئے راستیں جیڑہ نہ اَنت یا ما گپ ءُ تران نہ کن ایں۔ اے زھرشانیانی میان ءَ زھرشانی کنوکاں دزمنانجنی، آزار، ھور، سارتی، گرم ءُ سردریں جاھاں شپ ءُ روچانی نندگ، زوراکی، تیرگواری ءُ دزگیریاں ھوار ھر وڑیں جنجال اورپار کرتگ اَنت، بلے چہ وتی لوٹاں پشت ءَ نہ کنز اتگ اَنت۔
سمی دین ءَ گوشتگ کہ باز براں لھتیں سرکاری جھگیر دیم دیگ بیتگ ءُ آیاں گپ ءُ تران ءِ میان ءَ دروگیں کول کرتگ ءُ پد ءَ پیلو نہ بیتگ اَنت ءُ برےارش کن اَنت ءُ ھمے پیش دار اَنت کہ مئے زھرشانی ءُ لوٹ ھچ ارزیشت نہ دار اَنت۔ ھمے پالیسی ءِ سر ءَ کار ءَ اَنت کہ زھرشانی کنوکانی گپاں گوش مہ دار اِت دانکہ آ دم بہ بر اَنت ءُ بے اوست بہ بنت ءُ برو اَنت، چہ اے رویشت ءَ ھمے مارشت دیگ بیت کہ پہ بلوچ ءَ چہ ریاست پاکستان ءَ انساپ ءِ لوٹ بے نپ اِنت۔
آئی ءَ گوشتگ کہ راستی ھمیش اِنت کہ سرکار ءِ رویشتءَ ھمک وھد ءَ سکا بے اوست کرتگ۔ اگاں چہ ریاست ءِ نیمگ ءَ ھمک رند ءَ بے اوست کنگ ءَ ابید اے کھول زھرشانی کنگ ءَ اَنت ایشی مول اے نہ اِنت کہ آ چہ ریاست ءَ اوست دارگ ءَ اَنت بلکیں چہ اے زھرشانیاں اے درد، اے ناھکی ءُ اے زوراکیاں جھانءِ دیم ءَ آشکار کنگ ءَ اَنت۔ اے زھرشانی درد ءُرنجانی پیش کنگ ءِ بنشون اِنت۔ اےزھرشانی اے کھولانی اوست نہ اِنت بلکیں گھگیری اِنت۔ ریاستی زوراکیانی نہ منگ ءِ جار اِنت دانکہ ریاستی زوراکی برجاہ بنت اے گھگیری زھرشانیانی ھساب ءَ برجاہ بیت۔ اے زھرشانی گھگیری اَنت۔
