اسلام آباد: سند سجاگی پورم ءُ وائس پار مسنگ پرسنز سند ءِ سروک سارنگ جویو، سھنی جویو، مھب آزاد لگاری، اِزازلگاری ءُ آدگہ سندی راجدوستیں سروک اسلام آباد ءَ شتگ ءُ بلوچ یکجھتی کمیٹی ءِ برجاھیں زھرشانی نندانک ءَ نشتگیں مردمانی گون ءَ ھمدردی درشان اِش کرتگ۔ اود ءَ آیاں ڈاکٹر ماہ رنگ، ماہ زیب، سمی دین ءُ آدگہ مردمان ءَ اجرک چادر مانپوشتگ۔
سند سجاگی پورم ءِ سروک سارنگ جویو ءَ وتی تامربند ءَ گوشتگ کہ سندی ءُ بلوچانی درد یکے، سندی راج بلوچانی ھمک رنج ءَ آیانی ھمراھداری ءَ کنت۔ زوریں بیگواھی ءُ چکچینی ءِ بگیری ءَ تیوگیں سند ءَ زھرشانی کن ایں۔ سندی ءُ بلوچانی سیادی نہ تیوک ءَ درد ءُ رنجانی اِنت بلکیں ما یکیں زورگر ءِ ایردستین ءُ دو ھمبل نزوریں راجیں، ایردستیں راجانی درد ھم یکے بیت۔
آئی ءَ گوشتگ کہ سندی ءُ بلوچ وت ماں وت چہ ھزاراں سال گوستانی، زمینی، دودمانی ءُ سیاسی پارست ءَ ھمگرنچ اَنت۔ ھواری ءَ یکیں مول ءَ زورگرءِ بگیری ءَ دیم ءَ ھمے وڑ ءَ جھد کن ایں۔
