اسلام آباد ءَ بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی نندانک ءَ چل ءُ ھپت روچ سرجم بیتگ کہ انگت ءَ برجاہ اِنت۔زھرشانی کنوکیں مردماں مرچی ھم زھرشانی روانکے کش اتگ کہ آیاں بی وائی سی ءِ سروک ءُ زور بیگواھیں مردمانی اکس، بینر ءُ پلے کارڈ گون بیتگ اَنت۔
اے بابت ءَ آیانی گوشگ اِنت مئے زھرشانی تھنا پہ وتی ناھک ءَ بندیگیں سروکانی آجوئی ءِ لوٹ ءَ نہ اِنت بلکیں چہ دھکاں برجاھیں زوراکی ءُ زوریں بیگواھی ءُ ریاستی نادرسیانی بگیری ءَ یک گوستانکے گھگیری ءِ جار اِنت۔
آئی ءِ گوشگ اِنت کہ گوستگیں چل ءُ ھپت روچ بیت کہ پیرزالیں مات ءُ کسان سالیں زھگ پہ وتی آزیزانی آجوئی ءَ اد ءَ نشتگ اَنت۔ بلے واکداراں اے بابت ءَ ھچ سما نیست، رسانکدر ءَ ھم وتی چم بند کرتگ اَنت۔
آئی ءِ گوشگ اِنت کہ آیانی بے تواری ھمے راستی ءَ پدر کنت کہ زوراک پہ وتی پدریچ ءِ باندات ءَ کودکانی زندگیان کربان کنگ ءَ اِنت۔ بلے بلوچاں ھمے پیسلہ کرتگ کہ آ زوراکیانی دیم ءَ وتی گھگیری ءَ برجاہ دار اَنت۔
