بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ سے روچ پیش چہ ھب ءَ ھزدار ءَ روکیں یک وینے پاکستانی پوج ءَ پیر امر ءِ نزیک ءَ داشتگ ءُ جنین ءُ زھگ پہ زور چہ گاڑی ءَ ایر کرتگ اَنت ءُ مردین مساپر گوں گاڑی ءَ ھوار برتگ اَنت۔ داں باز اداراں جنین دگ ءِ سر ءَ ودار ءَ نشتگ اَنت ءُ چہ راھگوزیں گاڑیاں کمک ءِ لوٹ کرتگ ءُ ھزدار ءَ آتکگ اَنت۔
آئی گوشتگ زوربیگواہ کرتگیں مردمانی نام سراج ء بشیر اھمد، امران ء بشیر اھمد، زبیر ء ممتاز اھمد ءُ امتیاز ء ممتاز اھمد اِنت کہ دومی روچ ءَ آیانی کھولاں پہ آیانی آجوئی ءَ ھزدار ءِ ھند زاوہ ءَ زھرشانی کرتگ بلے پاکستانی پوج ءِ کارمند آتکگ اَنت ءُ آیانی سر ءَ تیرگواری کرتگ۔ چہ وشبھتی ءَ درسیں مردم رک اِتگ اَنت ءُ جانی تاوان نہ بوتگ۔
آئی گوشتگ کہ داں دو روچ ءَ آیانی کھول دگ ءِ سر ءَ نشتگ اَنت ءُ وتی آزیزانی آجوئی ءِ لوٹ کرتگ، بلے ریاست ءَ آیانی گپ ءِ گوش دارگ ءِ جاہ ءَ گیش جنین ترسینتگ اَنت۔ بلوچستان ءَ شال ءَ ابید گیشتریں دمگاں دامگ بند اِنت ءُ ھزدار ءَ گوستگیں شش ماہ اِنت کہ سرجم ءَ بند اِنت چہ ایشی سوب ءَ اے وڑیں ھالاں ڈن ءَ سر بوگ ءَ نہ اَنت۔
آئی گوشتگ کہ چہ اے ویلاں ھمے زانگ بیت کہ پاکستانی ریاست ءَ بلوچستان یک ٹوھیں زندانے ءَ مٹ کرتگ کہ اود ءَ ھمک روچ مردم زوربیگواہ کنگ بوگ ءُ انسانی ھکانی لگتمالی بوگ ءَ اِنت ءُ بلوچ چکچینی ءِ اے ویلانی پہ چیر دیگ ءَ سرجمیں بلوچستان ءَ دامگ بند کنگ بوتگ۔
آئی گوں بلوچ مھلوک ءَ لوٹ کرتگ ءُ گوشتگ کہ وتی آزیزانی آجوئی ءُ درکانودی کوش ءِ وڑیں ویلانی بگیری ءَ بے توار مہ بہ اِت۔ مئے بے تواری اے زوراکی ءُ ریاست ءَ گیش زوراکی کنگ ءَ کمک کنت۔
