بلوچ نیشنل موومنٹ ( بی این ایم ) ءِ بنجاھی چیئرمین ڈاکٹر نسیم بلوچ ءَ گوشتگ کہ مرچی شھید نواب اکبر ھان بگٹی ءِ شھیدی ءِ نوزدھمی سالروچ اِنت کہ آبلوچستان ءِ یک گرانکدر ءُ مزن شانیں کردے۔ آئی زندگی ءُ دیمونی بلوچ راج ءِ شرپ، ھک ءُ آجوئی جھد ءِ تچک ءُ پروش نہ وروکیں جوزگے ءِ چیدگ اِنت۔
آئی ءَ گوشتگ کہ نواب بگٹی زوراکیانی دیم ءَ گوں توکل ءَ اوشتاتگ ءُ سر جھل نہ کرتگ۔ پاکستان ریاست ءَ پہ بلوچستان ءِ توار ءِ دارگ ءَ زوراکی کرتگ گڑا آئی گھگیری کرتگ۔ تراتانی ءِ کوہ ءَ رتکگیں ھون مرچی ھم بلوچ پدریچ ءِ توکل اَنت ءُ آجوئی ءِ واھشت ءَ پیش دار اَنت۔
ڈاکٹر نسیم بلوچ ءَ گوشتگ کہ نواب بگٹی تھنا یک ٹکی سروکے نہ بیتگ بلکیں یک باسما ءُ لیکھی مجاھدے بیتگ آئی زانتگ کہ بلوچ راج آجوئی ءُ وتواکی ءَ ابید بوت نہ کنت۔ آ پاکستانی پوج ءِ دست ءَ کشگ بیتگ کہ مئے توکل پروش بہ وارت بلے آئی گھگیری ءَ نوکیں توانے بکش اتگ۔
آئیءَ گوشتگ کہ مرچیگیں روچ ءَ ما شھید نواب اکبر ھان بگٹی ءَ آئی گرانبھائیں دیمونی ءَ ستک شانی ندر کن ایں ۔ آئی شھیدی ءُ دیمونی نہ ترسی ءِ ھما چراگ اِنت کہ بلوچ راجی آجوئی زرمبشت ءَ رژن بکش اَنت ءُ رھشونی ءَ کن اَنت۔
