نیشنل ڈیموکریٹک پارٹی ( این ڈی پی ) ءِ جارکش ءَ ماں رسانکدر ءَ وتی شنگ کرتگیں درشانے ءَ گل ءِ بنجاھی سروک گنی بلوچ ءِ زوربیگواھی ءِ سے ماه سرجم بوگ ءِ درگت ءَ گوشتگ که اے وھد ءَ بلوچستان ءَ سیاست ءِ درسیں راه ءُ در بند کنگ بیتگ اَنت ، تھنا شش ماه ءَ ھشت سد ءَ گیش مردم زوربیگواه کنگ بیتگ که اے ھمے گپ ءِ منانک اَنت که ریاست بلوچ راج ءَ چه جمھوری ءُ ایمنیں جھد ءَ زبھر کنگءَ اِنت ، درسیں راجدوستیں گل ، نودربر ءُ ھمے وڑ ءَ زانشتی ءُ ادبی کار ھم ریاستی زوراکی ءِ آماچ اَنت ، بی وائی سی ءِ سروکاں دگه بازیں کچے ءَ کارکناں باز ماه اِنت که بندیگ اَنت ، اے درکانودی پالیسی روچ په روچ گیش بوگ اِنت ءُ اے زوراکی ءَ کانود ءِ ھساب ءَ برجاہ دارگ ءَ اَنت۔
آئی ءَ گوشتگ که اے زوراکیانی درچ ءَ نیشنل ڈیموکریٹک پارٹی ءِ جھموری جھدانی راه ھم بند کنگ بیتگ اَنت ، گل ءِ بنجاھی سروک ءُ نودربر گنی بلوچ ءِ زوربیگواھی اے زوراکی ءَ تچک ءَ پیشدارگ ءَ اِنت ۔ گنی بلوچ 25 مئی ءَ چه هزدار ءَ زوربیگواه کنگ بیتگ ءُ سے ماه ءِ سرجم بوگ ءَ پد ھم آئی ءِ ھچ وڑیں ھال نیست ، اے بابت ءَ انتزامیه ءِ بے تواری ءُ ایپ سی ءِ بگیری ءَ چه پولیس ءِ نیمگ ءَ ایپ آئی آر نه کنگ ھمے گپ ءَ تچک کنت ایپ سی ءِ پله مرزی ءَ آدگه ریاستی اداره ھم اے زوراکی ءَ تچک ءَ هوار اَنت ، چه ٹرانسپورٹ کمپنی ، پٹرول پمپ ءُ جتائیں جاھاں جتگیں سی سی ٹی وی کیمره ءَ ھمے زانگ بیت که گنی بلوچ ءِ زوربیگواھی ءَ ریاستی تچک ءَ هوار اَنت۔
جارکش ءَ گوشتگ که گل ھمے جار ءَ جنت که ما په وتی سروک ءُ کارکنانی آجوئی ءَ ھر پیمیں جھد ءَ برجاه دار ایں ، گنی بلوچ ءَ هوار آدگه سیاسی کارکنانی زوربیگواھی مئے جھد ءِ مستریں بھر اِنت ءُ داں آیانی آجوئی ءَ ما نه اوشت ایں ، زوربیگواھی ءِ پارست ءَ مئے توکل پروش نہ وارت ، اے کار مئے جھد ءَ گیش مھکم کنت۔
