اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ برجاھیں زھرشانی ءَ چل روچ سرجم بیتگ کہ انگت ءَ برجاہ اِنت۔ چو مدامی وڑ ءَ زور بیگواھیں مردمانی کھولاں پہ ھکانی لوٹ ءَ زھرشانی رونکے کش اتگ ءُ اوگام جتگ۔
چہ زھرشانی نندانک ءَ بی وائی سی ءِ سروک سمی دین ءَ وتی شنگ کرتگیں تامربندے ءَ گوشتگ کہ ما زھرشانی ءَ ھر پیمیں رنجاں اوپار کنگ ءَ ایں کہ مئے مردم آجو کنگ بہ بنت۔ بلے ما اد ءَ پہ زوریں بیگواھیانی بگیری ءَ زھرشانی کنگ ءَایں بلوچستان ءَ زوریں بیگواھی ءُ زوراکی ھما پیم ءَبرجاہ اَنت۔بلوچستان ءَ ھما پیم ءَ کہ ریاستی ادارہ زوراکی کنگ ءَ اَنت گڑا باید اِنت کہ ھمک بلوچ ،راج ءِ بستار ءَ چہ گساں در بہ کپ ایت۔
آئی ءَ گوشتگ کہ پئیری چار بیگواھیں بلوچانی لاش چگل دیگ بیتگ اَنت، ھمے وڑ ءَ ھمک روچ مردم زور بیگواہ کنگ بوگ ءَ اَنت۔ مرچی کہ اے زھرشانی پہ بیگواھیں مردماں اسلام آباد ءَ بوگ ءَ اِنت بلوچستان ءَِ درسیں بیگواھیں مردمانی کھول بیا اَنت ءُ زھرشانی ءَ بھر بزور اَنت۔
سمی دین ءَ گوشتگ کہ زوریں بیگواھیانی بابت ءَ بے تواری باندا دگہ ناوشیں ھالے کارایت ءُ مئے مردمانی لاش مارا دیگ بنت۔ اے وھد ءَ مئے زمہ واری اِنت کہ ما چہ وتی گساں در بہ کپ ایں۔ زور بیگواھیں مردم ءُ دروگیں میڑاں کشگ بیتگیں مرمانی کھول وت ءَ اد ءَ اسلام آباد ءِ زھرشانی ءَ سر بہ کن اَنت۔
