روکپتی بلوچستان: شستون (سراوان) ءَ مولانا ساداتی ءَ دِزک ءَ آدینگ ءِ نماز ءِ میان ءَ وتی درشانے ءَ گْوشتگ کہ چہ پاکستان ءِ بمبگواری ءَ شھید بیتگیں بلوچ اَنت ءُ بے میاریں مردم بیتگ اَنت۔
آئی ءَ وتی درشان ءِ تہ ءَ تران کناں ءَ گْوشتگ کہ کودکیں زھگ ءُ جنیناں ھوار دُرسیں شھید بیتگیں مردم بلوچ اَنت ءُ بےمیاریں مردم بیتگ اَنت کہ چہ پاکستانی لشکر ءِ میزائل اُرش ءَ شھید بیتگ اَنت ءُ ما اے ناھکی ءَ گوں تُرندی ءَ ایر جن ایں۔
آئی ءَ گْوشتگ کہ سیمسر ءِ دوئیں نیمگاں بلوچ ناگیگیں جاورانی دیمپان اَنت۔ مردمانی مال ءُ مڈّی پُلگ بیتگ اَنت ءُ اے دُرسیں چیز چہ ناھکی وتسریں شونداتانی بنیاد اَنت کہ بلوچ بازیں جنجالانی دیمپان اَنت۔
مولوی ساداتی ءَ گْوشتگ کہ سراوان دمگ ءَ بیتگیں میزائل اُرش یک ٹوھیں ناھکی یے کہ ما ایشی ءَ ھرچی ایر بہ جن ایں کم اِنت۔ میزائل اُرش ءَ شھید بیتگیں کودکیں زھگ ءُ جنیناں کجام میار بیتگ کہ وپتگیں واب ءَ نشانگ کنگ ءُ کُشگ بیتگ اَنت۔
مولانا ساداتی ءَ گْوشتگ کہ دیر اِنت روکپتی بلوچستان ءِ بلوچ زوراکی ءُ ناھکیانی دیمپان اَنت۔سدانی کچ ءَ مردم زور بیگواہ کنگ بیتگ اَنت کہ آیانی کھول پہ وتی مردمانی یل کنگ ءَ داں مرچی زھرشانی کنگ ءَ اَنت۔
آئی ءَ گْوشتگ کہ دوئیں نیمگاں نشتگیں بلوچانی زندگی گوں سیمسر ءَ بندوک اِنت ءُ سیمسر ءَ باپار بند کنگ بیتگ کہ اے ھم گوں بلوچ ءَ زوراکی یے۔چہ ایشی ءَ مردم باشیں جنجالانی دیمپان اَنت۔
