بلوچ نیشنل موومنٹ( بی این ایم ) ءِ چیئرمین ڈاکٹر نسیم بلوچ ءَ وتی شنگ کرتگیں درشانے ءَ گوشتگ کہ کسان سالیں شاری بلوچ ءَ وتی بیگواھیں ناکو شبیر بلوچ ءِ اکس گون اِنت کہ پاکستانی پوج ءَ اکتوبر 2016 ءَ آوار جتگ۔ یک دھکے بیت کہ آئی کھول گوں جنجالاں زند گوازینگ ءَ اِنت۔
آئی ءَ گوشتگ کہ شاری بلوچ گوں دگہ بازیں بلوچ ماتءُ زھگاں اسلام آباد ءَ زھرشانی ءَ نشتگ کہ اے نندانک ءَ ماھے ءَ گیش اِنت۔ آ پہ ھزارانی کچ ءَ بیگواھیں مردمانی آجوئی ءُ بلوچ یکجھتی کمیٹی ءِ سروکانی یل کناھینگ ءَ لوٹ کنگ ءَ اَنت۔بلے چہ آیانی پر ایمنں جھد ءَ ابید پاکستان ریاست ءُ آئی رسانکدر بے توار اَنت۔ ھمے گندگ بوگ ءَ اِنت کہ ریاست ءِ ھمک بھرگ پہ بلوچ راج ءِ توارءِ دارگءَ یکجاہ اِنت۔
ڈاکٹر نسیم بلوچ ءَ گوشتگ کہ شاری بلوچ ءِ کسانی پھریزگ ءُ چہ اے وڑیں رنجاں آجو کنگی بیتگ، بلے چہ ایشی ءَ ابید آئی ءَ وتی ناکو ءِ اکس گوں اِنت ءُ وتی مردمانی رنجانی گواہ اِنت۔
آئی ءَ گوشتگ کہ اے چھرگ یک راجے ءِ دردانی گواہ اِنت ءُ ھمے پیش دار ایت کہ زوریں بیگواھی کچ ءُ کساس کنگ نہ بنت، اے زندگی، کھول ءُ پدریچاں پہ مدامی ٹپی کنت۔
