اسلام آباد ءَ پہ بلوچ یکجھتی کمیٹی ءِ سروک ءُ کارکنانی ناھکیں دزگیری ءُ زوریں بیگواھیانی بگیری ءَ برجاھیں زھرشانی ءَ سی ءُ دو روچ سرجم بیتگ۔
اے بابت ءَ ڈاکٹر ماہ رنگ بلوچ ءِ گھار نادیہ بلوچ ءَ وتی پوسٹے ءَ نبشتگ کہ اسلام آباد ءَ مئے زھرشانی ءَ ماھے سرجم بیتگ اے میان ءَ چہ سرکار ءِ نیمگ ءَ پہ مئے لوٹانی منگ ءَ ابید زوراکی کنگ ءُ چہ اسلام آباد ءَ کشگ ءِ جھد کنگ بیتگ۔ چوشیں روچے نہ بیتگ کہ اسلام آباد انتزامیہ ءَ مئے گون ءَ زوراکی نہ کرتگ۔
آئی ءَ گوشتگ کہ اے گپ ءَ ھرکس زانت کہ ڈاکٹر ماہ رنگ بلوچ ءُ آئی ھمراہ پہ پرایمنیں جھد ءُ مردمانی جیڑھانی دیم ءَ آرگ ءِ بنیاد ءَ درکانودی دزگیر کنگ ءُ بند کنگ بیتگ اَنت۔ آ پہ وتی زاتی نپاں نہ بلکیں پہ بلوچستان ءِ زوریں بیگواھی، درکانودی کوش ءُ انسانی ھکاں جھد کنگ ءَ بیتگ۔
نادیہ بلوچ ءَ گوشتگ کہ بی وائی سی ءِ سروکانی دزگیری نہ تھنا پاکستان ءِ آئین ءَ نبشتگیں شھریانی آجوئی ءِ بگیری اِنت بلکیں ھمے گپ ءِ منانک اِنت کہ ریاست ایرادگریانی اوپار کنگ ءَ ابید زوراکی کنگ ءَ اِنت۔
آئی ءَ گوشتگ کہ ما ھمے لوٹ ءَ کن ایں ڈاکٹر ماہ رنگ ءُ آئی ھمبل گوستگیں چار ماہ اِنت درکانودی بندیگ اَنت یل کنگ بہ بنت۔ درسیں بیگواھیں مردم آجو کنگ ءُ درکانودی زوراکی بند کنگ بہ بیت ءُ انساپ ءُ آئین ءِ رد ءَ کار کنگ بہ بیت۔
