بلوچ یکجھتی کمیٹی ( بی وائی سی ) ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ که 12 اگست ءِ شپ ءَ ریاستی ادارھانی کارمنداں چه شال ءِ ھند اپنان ٹاون ءَ سرکاری بیوٹمز زانشجاه ءِ اسسٹنٹ پروپیسر ڈاکٹر اُسمان کازی گوں آئی برات جبران بلوچ ءِ ھواری ءَ زوربیگواه کرتگ، اے ویل نه تھنا بلوچستان ءَ بلوچ راج ءِ بگیری ءَ ریاست ءِ برجاھیں زوراکیانی درچ اِنت بلکیں زانشتی ادارھانی آجوئی ، استادانی ازّت ءُ اِلم ءِ ارزشتانی سر ءَ تچک ءَ اُرش اِنت۔
آئی ءَ گوشتگ که پروپیسر اُسمان ءَ دہ سال ءَ گیش اِنت که وانینگ ءُ پولکاری ءِ پڑ ءَ کار ءَ بیتگ ، آ نه تھنا وتی کار ءِ پڑ ءَ سوھو بیتگ بلکیں آ یک انچیں استادے بیتگ که آئی ءَ نودربرانی رھشونی ءُ زانشت ودی کنگ ءَ مزنیں کردے پیلو کنگ ءَ بیتگ ، آئی ءِ زانشتی راستی ، جھد ءُ مردمگری ءَ بیوٹمز ءِ ھمک نودربر ءُ استاد مسال ءَ دنت۔ اے پیمیں استاد که گوں وتی زانشت ءُ کرد ءَ په راج ءَ گرانبھائیں مڈی اَنت شپ ءِتھاری ءَ چه گس ءَ آوار جتگ ءُ کھول ءَ آئی ءِ آوار جنی ءِ بابت ءَ ھچ وڑیں سرپدی دیگ نه بیتگ ، اے انسانی ارزشت ، کانودی ھک ءُ انسانی بُنکی آجوئی ءِ تچک ءَ بگیری اِنت۔
بی وائی سی ءَ گوشتگ که اے ویل تھنا یک مردمے ءِ زوربیگواھی نه اِنت ، بلکیں یک کلوھے که بلوچ راج ءِ ھمک مردم ، اگاں استادے به بیت یا نودربر ءُ مزدورے بس آ وتی پجار ءِ بنیاد ءَ ریاست ءِ چم ءَ شکی ئیں مردمے زانگ بیت ، اے زوراکی ءِ مول ءُ مراد یک سرجمیں زانشتی چاگردے ءَ ترس ءِ ودی کنگ اِنت دانکه په جست گروک ءُ راست گوشیں ھمک مردماں یک سبکے به بیت۔
بی وائی سی ءَ وتی درشان ءِ گڈی ءَ گوں انسانی ھکانی میان استمانی ءُ دمگی ادارھاں ، سول سوسائٹی ، نودربر ءُ استادانی گلاں په پروپیسر ڈاکٹر اُسمان کازی ءُ آئی برات ءِ زوت آجو بوگ ءَ یکجاه ءُ ھواریں توار چست کنگ ءِ لوٹ کرتگ ءُ گوشتگ که اے جھد تھنا په یک کھولے ءَ نه اِنت بلکیں په سرجمیں چاگرد ءِ زانشتی ، مردمگری ءُ انسانی ارزشت ءَ جنگ اِنت۔
