اسلام آباد ءَ پہ بلوچ یکجھتی کمیٹیءِ سروک ءُ زور بیگواھیں مردمانی آجوئی ءَ برجاھیں زھرشانی ءَ سی روچ سرجم بیتگ کہ انگت ءَ برجاہ اِنت۔ زھرشانی ءَ پی ٹی ایم ءِ کارکناں ھوار جتائیں بھرگاں سیادی داروکیں مردماں بھر زرتگ۔
چہ زھرشانی جاہ ءَ آیانی گوشگ اِنت مرچی سرجمیں پاکستان ءَ شاتکامی ءِ روچ دارگ بوگ ءَ اِنت بلے مئے پیرزالیں مات اد ءَ نشتگ اَنت ءُ پہ وتی آزیزانی آجوئی ءَ لوٹ کنگءَ اَنت دانکہ مئے گسانی چراگ آجو بہ بنت ءُ ما ھم یک آجوئیں زندے بہ گوازین ایں۔
آیانی گوشگ اِنت کہ اد ءَ یک نیمگے ءَ آجوئی ءِ شاتکامی برجم دارگ بوگ ءَ اِنت ءُ دومی نیمگ ءَ لھتیں مات پہ وتی آزیزانی آجوئی ءَنشتگ اَنت۔ پما آجوئی ھما روچ ءَ بیت کہ بلوچستان ءَ بلوچ چکچینی بند کنگ بہ بیت۔
آیانی گوشگ اِنت کہ اے چونیں آجوئی یے اد ءَ پارلیمنٹ آجو نہ اِنت، اھوالکار آجو نہ اَنت، بس ھمے گپ گوشگ بیتگ کہ چاردہ اگست آجوئی روچ اِنت اے روچ ءَ شاتکامی بہ کن اِت۔ ما ھما روچ ءَ اے شاتکامی ءِ روچ ءَ دار ایں چہ بلوچانی گس ءَ ورنایانی زوریں بیگواھی بند بہ بیت۔ بلوچ ءَ ژانگولیں لاش دیگ مہ بیت۔ پہ ھمے آجوئی ءِ نام ءَ مارا لاش سوگات کنگ بوگ ءَ اِنت۔ دوشی یک بلوچ جنینے بیگواہ کنگ بیتگ گڑا اے کجام آجوئی اِنت۔
