بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ تربتءِ ھند آپسر ءَ یازدہ اگست 2025 ءِ شپ ءِ یازدہ ءَ پاکستانی پوج ءِ جوڑ کرتگیں کشندہ ٹولی ءِ کارمندانی نیمگ ءَ ھدا داد ءِ گسءِ سر ءَ ناشرکاریں دستی بمب ارش گوں ترندیں دانکاں ایر جتگ۔
آئی ءَ گوشتگ کہ اے ارش پہ زانت یک گسے نشانگ کنگ بیتگ، ایشی آسر ءَ دو جنین سکا ٹپی بیتگ اَنت۔ اے ویل بلوچانی بگیری ءَ مچی سزا ءِ زوراکی ءَ گیشتر پاشک کنت۔
آئی ءَ گوشتگ کہ اےکاروائی دگہ گستائیں ویلے نہ اِنت بلکیں یک ناشرکاری شونداتے ءِ بھر اِنت۔ ایشی مول توارانی دارگ، ترس آماچ کنگ ءُ پہ وتی ھکاں لوٹ کنوکیں مردمانی سزا دیگ اِنت، شھریانی بگیری ءَ اے وڑیں آزار دھی میان استمانی کانود ءِ رد ءَ میارے لیکگ بیتگ۔
آئی ءَ گوشتگ کہ پانک ریاستی سروکی ءَ بیوکیں اے ارشانی زوت بند کنگ، بلوچستان ءَ پاکستانی پوج ءِ میارباریانی بابت ءَ میان استمانی پٹ ءُ پول کنگ ءُ بلوچ شھریانی جانءُ شرپ ءِ پھازداری ءِ درگت ءَ گوں میان استمانی تک ءَ دزمانجی کنگ ءِ لوٹءَ کنت۔
آئی ءَ گوشتگ کہ اے وھد ءَ بلوچستان ءَ ھونریچی بوگ ءَ اِنت جھان ءَ بے توار بوگ نہ لوٹ ایت۔
