بلوچ وومن پورم ءِ سروک ءُ انسانی ھکانی کارکن ڈاکٹر شلی بلوچ ءَ وتی دزگیری ءِ بابت ءَ اکوام متھدہ ءِ جھگیری میری لاولر ءُ اکوام متھدہ ءِ زوریں بیگواھیانی سرءَ جوڑ بیتگیں ورکنگ گروپ ءِ نام ءَ پہ آیانی گپ جنگ ءِ منتواری ءَ نمدی نبشتہ کرتگ۔
ڈاکٹر شلی بلوچ ءَ گوں میری لاولر ءَ دلگوش گور کرتگءُ گوشتگ کہ گوستگیں ھپتگ ءَ گوادر ءَ مئے درکانودی دزگیری ءِ سر ءَ تئی گپ دیستگ اَنت من باز وش بوتگ آں۔ ما گوادر ءَ یک سرجمیں روچے ءَ زندان ءَ بند کنگ ءَ پد گوادر انتزامیہءَ مارا پہ زور تربت ءَ دیم داتگ ءُ پہ مانزمانی یل کنگ بیتگ ایں۔
آئی ءَ گوشتگ کہ من ترا دلگوش دیگ لوٹ آں کہ ما گوادر پریس کلب ءَ یک روچی دیوانے ءِ دارگ ءَ اِت ایں، ھمے درگت ءَ من درسیں ھندی ادارہ، شھری، اھوالکار، سیاسی ٹولی ءُ چاگردی گل لوٹتگ اَنت دانکہ ما بلوچستان ءِ انوگیں جاورانی سر ءَ گپ بہ جن ایں۔ ھمے مول ءِ رد ءَ من گوادر ءِ جتائین ھنداں گوں پرایمنی ءَ گند ءُ نند کرتگءُ پنتاک بھر ءُ بانگ کرتگ۔
ڈاکٹر شلی بلوچ ءَ گوشتگ کہ بے ارزی ءَ ما دزگیر کنگ بیتگ ایں۔ سرجمیں روچ ءَ مئے سر ءَ کانودی گپ نہ بیتگ اَنت بلکیں مارا بندیگ جاہ ءَ پہ زور لھتیں کاگدانی دزرند اِش پرماتگ۔ اود ءَ ھمے گپ بیتگ کہ ما دیم ءَ سیاسی کار نہ کن ایں ءُ گوادر ءَ دوبر نہ رو ایں۔ من ھمے سرپد باں کہ اے مئے تر ءُ گرد کنگ ءِ بنکی ھکانی بگیری اِنت۔
آئی ءَ گوشتگ کہ اے بابت ءَ من ھمے گوشگ لوٹ ایں کہ بلوچستان ءَ انسانی ھکانی سکا بگیری بوگ ءَ اِنت ءُ اے وھد ءَ دلگوش دیگی اِنت۔ اکوام متھدہ ءِ جھگیر بوگ ءِ بنیاد ءَ تئی منتوار باں تو بلوچستان ءَ بیا ءُ انسانی ھکانی لگتمالیانی سر ءَ رپورٹ بہ کن ءُ پہ اے جیڑھانی گیش ءُ گیوار کنگ ءَ کرد ءَ پیلو بہ کن۔
ڈاکٹر شلی بلوچ ءَ گوں اکوام متھدہ ءِ زوریں بیگواھیانی سرءَ ورکنگ گروپ ءِ نام ءَ وتی نمدی ءَ گوشتگ کہ من گوستگیں ھپتگ ءَ گوادر ءِ دمگی انتزامیہ ءِ دست ءَ درکانودی دزگیری ءِ سر ءَ شمئے دلگوش ءُ بلوچستان ءَ انسانی ھکانی بگیریانی سر ءَ شمے بژنیگ بوگ دیستگ دلبڈی رستگ ءُ اے بابت ءَ شمئے منتوار آں۔
آئی ءَ گوشتگ کہ من شمارا سھی کنگ لوٹ ایں کہ من ءُ منی سے دگہ سنگت ھمے روچ ءَ درکانودی دزگیری ءَ یک روچے ءِ گوازینگ ءَ پد یل کنگ بیتگ ایں۔ وش بھتی ایش اِنت کہ ما چہ زوریں بیگواھی ءَ کمو بچ اتگ ایں۔ ھمے میان ءَ مارا گوں وتی وکیل ءُ آدگہ سنگتاں گند ءُ نندگ ءَ نہ اشتگ۔
بلوچ وومن پورم ءِ سروکءَ گوادر ءِ دیوان ءِ بابت ءَ تر ءُ گرد کنگ ءُ پولیس ءِ درکانودی دزگیر ی ءِ بابت ءَگڈسر ءَ گوشتگ کہ ما دگہ درکانودی کارے نہ کرتگ، بلکیں یک پر ایمنیں سیاسی کارے ءَ بیتگ ایں کہ آ نہ پاکستان ءِ راھبند ءِ بگیری اِنت ءُ نہ میان استمانی کانود ءِ رد ءَ رد اِنت۔
ڈاکٹر شلی بلوچ ءَ دیمتر ءَ گوشتگ کہ پولیس ءِ بندیگجاہءَ یک روچےءِ گوزینگ ءَ ما ھمے مار اتگ کہ اگاں کسے دیر اِنت زور بیگواہ کنگ بیتگ آ ءُ پہ آئی گوں کھول ءَ اے چنچو دردیگیں کارے۔
آئی ءَ گوشتگ کہ من ھمے بابت ءَ گوں شما لوٹ کن ایں کہ شما بلوچستان ءَ تر ءُ گرد بہ کن اِت، جتائیں جاھاں برو اِت ءُ زوریں بیگواھیانی منانکاں یکجاہ کن اِت ءُ یک رپورٹے جوڑ بہ کن اِت دانکہ اے ٹوھیں جیڑہ ءَ میان استمانی تک ءَ دیم ءَ بیار اِت۔
ڈاکٹر شلی بلوچ ءَ گوشتگ کہ من یکبرے پد ءَ شمئے گون ءَ لوٹ کن ایں کہ شما اے جیڑہ ءِ سر ءَ وتی کرد ءَ پیلو بہ کن اِت۔
