ھب چوکی: گڈانی ءَ چه آپ ءِ نه بوگءِ بگیری ءَ جنیناں شپ بریکنگ یارڈ دگ بند کرتگ ءُ زھرشانی کرتگ۔
زھرشانی ءَ آیاں تران کرتگ ءُ گوشتگ که گڈانی ءِ مردم مید ءُ مزدور اَنت ءُ آ په دو وھد ءِ نان ءَ پریشان اَنت ، آیاں چوشیں گنجاھشت نیست کہ ٹینکرے آپ پہ چار ءُ پنچ ھزار ءَ زرتگ بہ کن اَنت۔
آیاں گوشتگ که گڈانی ءِ شھر ءِ جتائیں جاھاں شش ماه پیش آپ دیگ بیتگ ءُ انوں سرجم ءَ بند کنگ بیتگ، ھمے وڑ ءَ گڈانی ءِ بازیں جاھاں گوستگیں ده سال اِنت که آپ نیست ءُ ھما ھنداں که کمو آپ دیگ بیتگ آ ھم انوں بے آپ اَنت۔
زھرشانی کنوکاں گوں بلوچستان سرکار ءُ ڈپٹی کمشنر ھب ءَ لوٹ کرتگ که آ زوت آپ ءِ جیڑھ ءَ گیش ءُ گیوار به کن اَنت ءُ آپ ءِ دُزی ءَ ھواریں درسیں مردمانی بابت ءَ پٹ ءُ پول به کن اَنت ، اگاں مئے لوٹ سرجم کنگ مه بنت گڑا ما شال کراچی شھدگ ءِ بند کنگ ءُ زھرشانی کن ایں۔
