اسلام آباد ءَ بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی مرچی دوازدہ روچ اِنت کہ برجاہ اِنت۔ چہ پولیس ءُ چیریں ادارھانی نیمگ ءَ گوں کھولاں زوراکی کنگ بوگ ءَ اِنت۔
چو مدامی وڑ ءَ آیاں مرچی ھم زھرشانی روانکے کش اتگ بلے مرچی پد ءَ اسلام آباد پولیس ءَ پریس کلب ءِ دیم ءَ روگ ءَ نہ اِشتگ اَنت۔ پہ زھرشانی ءِ کم پیش کنگ ءَ انتزامیہ ءِ نیمگ ءَ زھرشانیءِ نزیک ءَ بس اوشتارینگ بوگ ءَ اِنت۔
زھرشانی کنوکیں مردمانی گوشگ اِنت کہ اگاں بلوچاں پر ایمنیں زھرشانی کنگ ءِ ھک نیست گڑا مارا ریاست بہ گوش ایت کہ ما چے بہ کن ایں؟ اسلام آباد ءِ دگانی سر ءَ بے نمبر پلیٹیں گاڑی مئے رندگیری ءَ کنگ ءَ اَنت۔ چہ ریاستی داراھانی گوشگ ءِ پد ءَ ما چہ باڑھی گساں کشگ بوگ ءَ ایں۔
آیانی گوشگ اِنت کہ ما چہ ریاستی ادارھانی زوراکیاں ھچ وڑ ءَ چہ وتی لوٹاں پد کنز نہ بہ ایں۔ دانکہ مئے لوٹ منگ نہ بیتگ اَنت ما وتی زھرشانی ءَ برجاہ دار ایں۔
