بلوچ اسٹوڈنٹس کونسل پنجاب ءِ جارکش ءَ وتی شنگ کرتگیں درشانے ءَ گوشتگ کہ دوشی ھکیم بلوچ ءِ درکانودی آوارجنی ءَ بژنیگ ایں ءُ ایشی گوں ترندیں دانکاں ایر جن ایں۔
آئی ءَ گوشتگ کہ ایڈوکیٹ ھکیم بلوچ ءَ اسلامیہ یونیورسٹی بھاولپور ءَ ایل ایل بی گریجویٹ کرتگ ءُ بلوچ اسٹوڈنٹس کونسل بھاولپور ءِ پیشیگیں باسک اِنت۔ دوشی سے ءَ سی ٹی ڈی ءِ کارمنداں چہ گس ءَ بروری دگ، شال ءَ آوار جتگ۔
آئی ءَ گوشتگ کہ ھکیم بلوچ بلوچستان بار کونسل ءِ رد ءَ کوئٹہ ءَ بار ایسوسی ایشن ءَ وکیلی کنگ ءَ بیتگ ءُ انوگیں روچاں بارو وکیشنل کورس ءَ بیتگ۔ دو ھپتگ ءَ پیش آئی چہ کورٹ ءَ لائسن گپتگ، بلے آ وت نوں انساپ لوٹوکیں ھزارانی کچ ءَ بلوچ نودربرانی لڑ ءَ ھوار بیتگ۔
آئی ءَ گوشتگ کہ بلوچ نودربر سسائی زوراکیانی آماچ کنگ بوگ ءَ اَنت، پہ بلوچ نودربراں زانت دربرگ ءِ درسیں دروازگ بند کنگ بوگ ءَ اَنت۔ نودربرانی زوریں بیگواھیءِ درچ تیز کنگ بوگ ءَ اِنت، ایشی ھرپیم ءَ بگیری ءَ کن ایں۔ ریاست زوت ھکیم بلوچ ءَ یل بہ کناھین ایت اگاں نہ بلوچ اسٹوڈنٹس کونسل پنجاب زھرشانی کنت۔
آئی ءَ دیمتر ءَ گوشتگ کہ ما گوں درسیں انسانی ھکانی ادارہ، وکیلانی گل، سول سوسائٹی ءُ رسانکدر ءَ لوٹ کن ایں کہ اے درکانودی زوراکی ءِ بگیری ءَ توار چست بہ کن اَنت ءُ پہ ھکیم بلوچ ءِ آجوئی ءَ وتی کرد ءَ پیلو بہ کن اَنت۔
