پاکستانی پوج ءِ دست ءَ زور بیگواھیں شاہ نواز بلوچ ءِ مات ءَ وتی شنگ کرتگیں تامربندے ءَ پہ وتی زھگ ءِ آجوئی ءَ لوٹ کرتگ ءُ گوشتگ کہ منی زھگ شاہ نواز 10 سال پیش 16 اگست 2014 ءَ بیگواہ کنگ بیتگ۔
آئی ءَ گوشتگ کہ دہ سال ءِ گوزگ ءَ پد ھم ما نہ زاناں کہ منی زھگ زندگ اِنت یا نہ۔ من پہ وتی زھگ ءِ آجوئی ءَ ھمک در ٹک اتگ، آمیدگس ءَ شتگ ءُ وتی پریات برتگ۔ ھمک زھرشانی ءَ بھر زرتگ ءُ وتی زھگ ءِ آجوئی ءِ لوٹ کرتگ، بلے من ءَ ھچ جاہ ءَ انساپ نہ رستگ۔
آئی ءَگوشتگ کہ من ھمے گوشگ لوٹ آں کہ اگاں منی زھگ ءِ سر ءَ چونیں بھتامے ھست آمیدگس ءَ پیش کنگ بہ بیت، اگاں آ بے میار اِنت گڑا چی ءَ بیگواہ کنگ بیتگ۔ اگاں یک ماسے ءِ زھگ بیگواہ بہ بیت ءُ آ ھچ ءَ سرپد مہ بیت آئی دل ءَ چے گوز ایت۔
آئیءَ گوشتگ کہ ھما مردم مئے گونءَ اوشتاتگ اَنت ءُ پہ مئے زھگانی آجوئی ءَ توار اِش چست کرتگ آ بے توار کنگ بیتگ اَنت۔ ڈاکٹر ماہ رنگ بلوچ ءُ آدگہ انسانی ھکانی کارکن زندانی کنگ بیتگ اَنت۔
آئی ءَ گوشتگ کہ ما انساپ ءُ وتی آزیزانی آجوئی ءِ لوٹ ءَ کن ایں۔ اگاں زندگ اَنت گڑا دیم ءَ آرگ ءُمارا پیش دارگ بہ بنت،اگاں کشگ بیتگ اَنت مارا راستیں گپ ءَ بہ گوش اَنت۔
