بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں کلات ءُ تربت ءَ چار جتائیں اُرشاں زورگریں پاکستانی پوج نشانگ کرتگ. اے اُرشاں چیر کرتگیں شورھانی تراک ءُ تچک ءَ سلاه بندیں اُرش ھوار انت۔
آئی ءَ گوشتگ که بی ایل اے ءِ سرمچاراں مرچی کلات ءِ ھند مکئی ءَ جوھان دوراھی ءِ نزیک ءَ پاکستانی پوج گوں دو بمب اُرش ءَ نشانگ کرتگ. سرمچاراں اولی اُرش ءَ زورگریں پوج ءِ بمب درگیجوکیں ٹولی ءِ پیادگیں کارمند ھما وھد ءَ گوں چیر کرتگیں شورھاں نشانگ کرتگ انت که آ بمب درگیجگ ءَ بیتگ اَنت ، تراک ءِ آسر ءَ یک کارمندے جاھی مرتگ ءُ دومی ٹپی بیتگ.
جارکش ءَ گوشتگ که سرمچاراں ھمے ھند ءَ زورگریں پوج ءِ پیادگیں کارمند دگه یک بمب اُرشے ءَ هم نشانگ کرتگ اَنت که ایشی آسر ءَ زورگریں پوج ءِ دگه دو مرتگ ءُ یکے ٹپی بیتگ.
آئی ءَ گوشتگ که بی ایل اے ءِ سرمچاراں مرچی دیگر ءِ وھد ءَ کلات ءِ ھند مورگند ءَ زورگریں پاکستانی پوج ءِ کارمند ھما وھد ءَ اسنائپر اُرشے ءَ نشانگ کرتگ که آ وتی چوکی ءِ نزیک ءَ په راشن برگ ءَ سر بیتگ اَنت ، اسنائپر اُرش ءَ زورگریں پاکستانی پوج ءِ یک کارمندے جاھی مرتگ ، ھمے میان ءَ سرمچاراں زورگریں پوج ءِ چوکی ءِ سر ءَ گوں ٹوھیں سلاھاں اُرش کرتگ ءُ گرنیڈ لانچر ءِ بازیں گولا آس داتگ ایشی آسر ءَ دژمن ءَ دگه گیش جانی ءُ مالی تاوان بیتگ.
جارکش ءَ گوشتگ که بی ایل اے ءِ سرمچاراں یکشمبے ءِ شپ ءَ تربت ءِ ھند گنه ءَ پاکستانی پوج ءِ گاڑیانی کاروان ءِ سر ءَ سنگر گپتگ ءُ اُرش کرتگ ، زورگریں پاکستانی پوج ءِ دو گاڑی تچک ءَ اُرش ءِ زد ءَ اتکگ ھمے وڑ ءَ آدگه کارمند گوں گاڑیاں تتکگ اَنت ، اُرش ءِ آسر ءَ زورگریں پوج ءِ کم چه کم دو کارمند مرتگ ءُ باز ٹپی بیتگ۔
جیھند بلوچ ءَ درشان ءِ گڈی ءَ اُرشانی زمه واری من اتگ۔
