تربت: مھمد ھنیپ نورزئی ءِ برات گلداد نورزئی ءَ تربت پریس کلب ءَ پریس کانپریس کرتگ ءُ گوشتگ که آ 4 جون 2025 ءَ وتی کھول ءِ ھمراھی ءَ وھدے که چه تمپ ءَ دیم په شال ءَ روگ ءَ بیتگ کہ سلاه بندیں مردماں آوار جتگ ءُ بیگواه کنگ کرتگ ، سلاه بندیں مردماں آئی ءِ کھول یل کرتگ بلے آ وت انگت بیگواه اِنت ءُ سلاه بندیں مردمانی کر ءَ بندیگ اِنت ، چه اے ویل ءَ پد سرجمیں کھول پریشانی ءُ سسائی جنجالانی آماچ اِنت۔
آئی ءَ گوشتگ که مھمد ھنیپ یک ایماندار ءُ مردم دوستیں سرکاری سروگانے که آئی ءَ کار ءِ وھد ءَ په مردمانی کار ءَ اتکگ چه ھمے سوب ءَ آ گوں یک پھازدارے ءَ سپر کنگ ءَ بیتگ۔
گلداد نورزئی ءَ گوشتگ که دومی نیمگ ءَ بلوچ آجوئی لوٹوکیں سلاه بندیں گل بی ایل ایپ ءَ آئی ءِ دزگیر کنگ ءِ زمه واری من اتگ ، بلے انگت چه بی ایل ایپ ءِ نیمگ ءَ مھمد ھنیپ نورزئی ءِ دزگیری ءِ بابت ءَ هچ وڑیں لوٹ یا گپ دیم ءَ نیاتکگ ، چه آئی ءِ بیگواھی ءَ پد چاگردی رسانکدر ءَ شنگ کنگ بیتگیں تامربندے ءَ گندگ بیت که مھمد ھنیپ نورزئی گوشگ اِنت که بی ایل ایپ ءَ آئی کھول گوں شرپ ءَ یل کرتگ ، تامربند ءِ ته آ گوں شریں جاوراں گندگ بیت بلے انگت آئی ءِ یل کنگ ءِ بابت ءَ ھچ وڑیں دیمروی کنگ نه بیتگ۔
پریس کانپریس ءِ گڈی ءَ مھمد ھنیپ نورزئی ءِ کھول ءَ گوں بی ایل ایپ ءَ مردمگری ، بلوچی ربیدگی ءُ انساپ ءِ پارست ءَ آئی ءِ زوت یل کنگ ءِ لوٹ کرتگ ، آیاں ھمے وڑ ءَ گوں درسیں سیاسی ، ٹکی ، مھذبی ءُ چاگردی مردماں لوٹ کرتگ که آ اے بابت ءَ وتی کرد ءَ پیلو به کن اَنت دانکه یک بے میاریں کھولے ءِ جنجال ھلاس به بنت۔
