پری بلوچستان موومنٹ ( ایپ بی ایم ) ءِ سروک ءُ بلوچ رھشون ھیربیار مری ءَوتی شنگ کرتگیں درشانے ءَ گوشتگ که اکوام متھده ءِ جولائیءَ سلامتی کونسل ءِ سروکی پاکستان ءَ دیگ بیتگ که اے انسانی ھکانی بگیری اِنت۔ پاکستان ریاست زورگپتیں بلوچستان ءَ جنگی میارباری ءُ بازیں زوراکیاں ھوار اِنت ، آئی ءَ که ناشرکار ءُ جھاد ودی کرتگ جھان ءَ تچکءَ بیھار دیگ ءَ اِنت چے آ نوں ایمنی ءِ جیڑہ ءَ گیش ءُ گیوار کرتگ کنت۔
ھیربیار مری ءَ گوشتگ که اے ھما ریاست اِنت که ایوک ءَ کینگ ءَ گیش کنگ ءَ اِنت بلکیں کشمیر ءَ ھم آدگه مھدبانی بگیری ءَ کار ءَ اِنت ، پاکستان په مھذبی ٹولیانی مھذب ءِ مٹ کناھینگ ءَ لاچار کنوکیں مردمانی سروکی ءِ کرد ءَ پیلو کنگ ءِ اِنت۔
آئی ءَ گوشتگ که ماں اکوام متھده ءَ پاکستان ءِ جھگیر ءَ گوشتگ که آ میان استمانی جیڑھاں گوں سپارت کاری ءَ گیش ءُ گیوار کنت ، اے ھما ریاست اِنت که آئی ءَ داں بازیں دھکاں اوگانستان ءَ جنگ ءُ جیڑھ ءِ آس روک کرتگ ، ھمے وڑ ءَ 1970 ءِ دھک ءَ ھزارانی کچ ءَ بنگالی کشتگ ءُ کمشرپ کرتگ ، جنزل زیاءالھک ءِ وھد ءَ اُردن ءَ هزارانی کچ ءَ پلستینی کشتگ ، اے ھما ڈیھ اِنت که آئی ءَ 1948 ءَ اکوام متھده ءِ رھبندانی آرٹیکل 2 ءِ بگیری ءَ بلوچستان زور گپتگ ءُ درکانودی گوں پاکستان ءَ هوار کرتگ ، چه ھما وھد ءَ داں مروچی ھزارانی کچ ءَ بلوچ کشتگ ءُ بیگواه کرتگ۔
ھیربیار مری ءَ گوشتگ که هان کلات ءِ کستریں برات شھزادگ ابدالکریم پاکستان ءَ په گپ ءُ تران ءَ لوٹائینتگ بلے تران ءِ جاه ءَ آ 17 سال ءَ بندیگ کرتگ ، ھمے وڑ ءَ نواب نوروز هان په گپ ءُ تران ءِ نیمون ءَ چه کوه ءَ ایرکرتگ ءُ آئی ءِ زھگ ءُ ھمراه پاھو داتگ اَنت ، آ وت نھ سال ءَ پد زندان ءِ ته ءَ بیران بیتگ ، پاکستان ءُ آئی ادارھاں اے دوئیں رند ءَ په گپ ءُ تران ءَ کرآن ءِ نام ءِ سر ءَ سوگند وارتگ ، بلے دوئیں رند ءَ تچک ءَ کرآن ءِ کمشرپی اِش کرتگ۔
ھیربیار مری ءَ وتی درشان ءِ گڈی ءَ گوشتگ که وھدے که میاربار سزا دیگ نه بنت میان استمان ءِ بروسه ھم ھلاس بیت۔
