شال: بیگواھیں بلوچانی توار ( وی بی ایم پی ) ءِ نیمگ ءَ برجاھیں زھرشانی گدان ءَ 5311 روچ سرجم بوتگ۔ سے شمبے ءِ روچ ءَ بلوچ وتن پارٹی ءِ الی زپر، رھمت مری، دوستین مری ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءِ ھمے کہ سیاسی جاور اَنت ایشی ءَ نزاں بلے اے درچ چہ 1948 ءَ بندات بوتگ ءُ انگت برجاہ اِنت، مدام بلوچ پسگانی زوریں بیگواھیانی ھال رسگ ءَ اَنت۔
ماما کدیر گوشتگ کہ اے زوراکی چہ 2000 ءَ بندات بوتگ ءُ داں مرچی ءَ ھم برجاہ اَنت۔ پہ ایشی بارو ءَ میان استمانی ادارہ پٹ ءُ پول بہ کن اَنت کہ اے پہ مردمگری ءَ سکا مزنیں تباھی یے۔ اے وھد ءَ ھزارانی کچ ءَ بلوچ پسگ درکانودی آوار جنگ ءُ بیگواہ اَنت۔
آئی گوشتگ کہ چہ بلوچستان ءِ کنڈ کنڈ ءَ بلوچ پسگ بیگواہ کنگ بوگ ءَ اَنت۔ کوھلو، ڈیرہ بگٹی، نوشکے، ھاران، تربت، پنجگُور ءُ بلوچستان ءِ آدگہ جاھاں ھم انگت ءَ برجاہ اِنت۔ کسے ءَ ایپ سی ءُ کسے سی ٹی ڈی ءَ آوار جتگ۔
ماما کدیر گوشتگ کہ ھمے وڑ ءَ پاکستان ءَ 1970 ءَ گوں بلوچ ءُ بنگالیاں کرتگ پاکستانی لشکر پد ءَ کنگ ءَ اِنت۔ پہ پرایمنیں جھد ءِ دارگ ءَ مھذبی ءُ ٹکی مردم کارمز بوگ ءَ اَنت۔
آئی ءَ گوشتگ کہ اے وھد ءَ شست ھزار ءِ نزیک ءَ بلوچ زور بیگواہ کنگ بوتگ اَنت آیانی ھچ وڑیں ھال نیست۔ پہ اے وڑیں مردمی ھکانی لگتمال کنگ ءَ نزوریں راجاں پاد آھگ ءُ توار چست کنگ لوٹ ایت۔
