پنجگور: گوستگیں روچ ءَ پاکستانی پوج ءِ جوڑ کرتگیں کشندہ ٹولی ءِ دست ءَ زور بیگواہ کنگ بیتگیں زیشان زھیرءِلاش دزکپتگ۔
بنشون ءِ رد ءَ زیشان زھیر ءِ لاش مرچی سھب ءَ چہ سوردو ءَ گریب نواز ھوٹل ءِ نزیک ءَ دزکپتگ۔ زیشان زھیر ءَ زی بیگاہ ءَ چہ پنجگور ءِ پٹبال چاراہ ءَ کشندہ ٹولی ءِ کارمنداں آوار جتگ ءُ بیگواہ کرتگ اَت۔
پولیس ءِ گوشگ اِنت کہ زیشان زھیر ءِ لاش پہ ھژدری چار ءُ ٹپاس کنگ ءَ نادراھجاہ ءَ برگ بیتگ کہ لاش ءَ بازیں تیرانی ٹپ ھم گندگ بیتگ اَنت۔
زیشان زھیر ءِ بیگواھی ءِ بگیری ءَ آئی کھول ءُ ھندی مردماں دوشی زھرشانی ءَ دگ بند کرتگ اَت ءُ آئی آجوئی ءِ لوٹ کرتگ اَت۔
چوش کہ زیشان زھیر ءِ پت زھیر بلوچ ھم 13 اپریل 2015 ءَ پاکستانی پوج ءَ آوار جتگ ءُ بیگواہ کرتگ کہ انگت بیگواہ اِنت۔ زیشان بلوچ مدام پہ وتی پت ءِ آجوئی ءَ توار چست کنگ ءَ بیتگ۔ پہ وتی پت ءِ آجوئی ءَ زھرشانی کنگءِ پژدرءَ شال ءَ پولیس ءَ ھم دزگیر کرتگ اَت۔
دوشی زیشان زھیر ءِ بیگواھی ءِ ھال ءِ ماں رسانکدر ءَ شنگ بوگ ءَ پدانسانی ھک ءُ سیاسی گل ءُ کارکناں آئی آوار جنیءِ سر ءَ بژن درشان کرتگ اَت ءُ آئی آجوئی ءِ لوٹ کرتگ اَت۔
