شال: وائس پار مسنگ پرسنز ( وی بی ایم پی ) ءِ سرکماش نسرالله بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بلوچ نودربر ماه جبین بلوچ ءِ زوربیگواھی ءَ ماھے سرجم بیتگ بلے آ ناں آمیدگس ءَ پیش کنگ بیتگ ناں آئی کھول ءَ اے بابت ءَ سرپدی دیگ بیتگ که اے سکا ناگیگ ءُ مردمانی بنکی ھکانی بگیری اِنت۔
آئی ءَ گوشتگ که ماه جبین ءِ کھول ءَ آئی کیس گل ءِ کر ءَ پیش کرتگ ءُ گوشتگ که ماه جبین بلوچ بسیمگ ءِ جاه منند اِنت که ءُ 29 مئی ءَ ریاستی ادارھانی کارمنداں چه سول نادراھجاه شال ءَ درکانودی آوار جتگ ، چه ایشی ءَ پد آئی ھچ وڑیں ھال نه بیتگ۔
نسرالله بلوچ ءَ گوشتگ که آئی کھول ءِ گوشگ اِنت پاکستان پوج ءَ ماه جبین ءِ برات یونس بلوچ ھم چه آئی زوربیگواھی ءَ ھپتگے پیسر چه بسیمگ ءَ آئی گس ءَ آوار جتگ ، انگت ءَ یونس ءِ هم ھچ وڑیں ھال نیست که چون اِنت ءُ کجام اداره ءِ کر ءَ بندیگ اِنت. ماه جبین ءُ آئی برات یونس ءِ آمیدگس ءَ پیش نه کنگ بژنیگ ءُ انسانی ھکانی بگیری اِنت۔
نسرالله بلوچ ءَ وتی درشان ءِ گڈی ءَ گوں سرکار ءُ ریاستی ادارھانی سروکاں لوٹ کرتگ که آ په بلوچ نودربر ءُ آئی برات ءِ یل کنگ ءَ وتی کرد ءَ پیلو به کن اَنت، اگاں ماه جبین ءُ آئی برات چونیں درکانودی کاراں ھوار بیتگ اَنت گڑا آ آمیدگس ءَ پیش کنگ به بنت ءُ آیانی کھول ءَ گون ءَ ڈیھ ءِ رھبندانی رد ءَ پیش بہ بنت ءُ آیاں چہ ماہ جبین ءُ یونس ءِ زوریں بیگواھی ءِ گماں آجو بہ کن اَنت۔
