نوشکے: این ڈی پی ءِ بنجاھی سروک گنی بلوچ ءِ زوریں بیگواھی ءِ بگیری ءَ کھول ءَ نوشکے ءَ شھدگ بند کرتگ ءُ نندانک برجاہ اِنت۔ زھرشانی ءَ مردماں بازیں کچے ءَ بھر زرتگ۔
آیانی گوشگ اِنت کہ گنی بلوچ ءِ زوریں بیگواھی ءَ ماھے گوستگ کہ آئی بابت ءَ چہ سرکار ءِ نیمگ ءَ مارا ھچ وڑیں سرپدی دیگ نہ بیتگ ما لاچار ایں کہ زھرشانی بہ کن ایں۔ مرچی ئیں زھرشانی ریاستی زوراکی ءُ سرکار ءِ نادزرسی ءَ پیش دار ایت۔
آیاں گوں نوشکے ءِ باسمائیں سیاسی ءُ انسانی ھکانی کارکناں ھوار گوں درسیں بھرگاں سیادی داروکیں مردماں لوٹ کرتگ کہ آ بیا اَنت ءُ اے زھرشانی ءَ بھر بزور اَنت ءُ گنی بلوچ ءِ زوتیں آجوئی ءِ لوٹ بہ کن اَنت۔
آیاں لوٹ کرتگ ءُ گوشتگ کہ گنی بلوچ زوت آجو کنگ بہ بیت اگاں آئی سر ءَ چونیں بھتامے ھست گڑا آمیدگس ءَ پیش کنگ بہ بیت ءُ گوں کھول ءَ انساپ کنگ بہ بیت۔
کھول ءِ گوشگ اِنت دانکہ گنی بلوچ آجو نہ بیتگ ما وتی زھرشانی ءَ برجاہ ادار ایں ءُ مئے زھرشانی گیشتر ترند کنگ بیت۔
