تربت: چه پاکستانی ریاست ءِ نیمگ ءَ ابدوئی سیمسر ءِ بند کنگ ءِ بگیری ءَ مردمانی زھرشانی ءَ مرچی سیمی روچ اِنت که تربت ، ڈی بلوچ ءَ برجاه اِنت۔
برجاھیں زھرشانی ءَ آل پارٹیز کیچ ءُ انجمن تاجران ءَ ھوار چه کیچ ءُ کش ءُ کراں جتائیں سیاسی ءُ چاگردی گل ءُ سروکاں بھر زرتگ. چه ایشی ءَ اَبید گوں سیمسر ءِ کار ءُ بار ءَ سیادی داروکیں مردم ، بی وائی سی ءِ سروک ءُ لس مردماں ھم بازیں کچے ءَ بھر زرتگ. آیاں سیمسر ءِ بند کنگ گوں ترندیں دانکاں ایر جتگ۔
زھرشانی کنوکاں گوشتگ که سیمسر ءِ کار ءُ بار مردمانی روزگار اِنت ءُ چه سیمسر ءِ بند بوگ ءَ مردم سک جنجال اَنت ۔ اد ءِ مردمانی درسیں کار ءُ بار گوں سیمسر ءَ بندوک اَنت اگاں اے بند کنگ بیت آئی سوب ءَ دمگ ءِ ته ءَ بازیں میارباری ودی ، چه ایشی ءَ سرکار بائد اِنت که به جیڑ ایت ءُ مردمانی کار ءُ باری سیتّانی پھازداری ءَ به کنت۔
آیاں گوشتگ که چار ماه اِنت سیمسر یکشل ءَ بند اِنت اے اولی رند اِنت که سیمسر ءِ بند کنگ ءِ بگیری ءَ زهرشانی کنگ ایں بلے چه بدبھتی ءَ ما سک وتی زھرشانی دیر ءَ بندات کرتگ ، ابید چه زھرشانی ءُ نندانک ءَ مارا دگه ھچ راه نیست ، ما درسیں دروازگ ٹک اِتگ اَنت بلے کس ءَ مئے توار نه اِش کرتگ۔
