بلوچ یکجھتی کمیٹی ( بی وائی سی ) ءِ جارکش ءَ ماں رسانکدر ءَ وتی شنگ کرتگیں درشانے ءَ کیچ ءِ ھند زامران ءَ ایرانی چیردستیں بلوچستان ءِ ھواریں ابدوئی سیمسر ءِ یکشلیں بندی بلوچستان ءَ ریاست ءِ نیمگ ءَ مالی لٹ ءُ پل لیک اتگءُ گوں ترندیں دانکان ایر جتگ۔
آئی ءَ گوشتگ که چه 19 مارچ ءَ ابدوئی سیمسر بند اِنت ایشی سوب ءَ سدانی کچ ءَ کھولانی روزگار پلگ بیتگ ءُ دمگ ءِ مالی جنجال گیش بیتگ۔ دمگ ءِ مردم چوش که مزدور ، تاجر ءُ لس شھریانی روزگار ھمے سیمسر اِنت آ سکا گژن، تنگدستی ءُ نگیگیں جاورانی آماچ اَنت چہ روزگار ءِ نہ بوگ ءِ سوب ءَ اے بندش انسانی تباھی یے جوڑ بیتگ۔
بی وائی سی ءَ گوشتگ که چہ سرکار ءِ نیمگ ءَ ابدوئی سیمسر ءِ بند کنگ ءِ بگیری ءَ گوں سیمسری کار ءُ بار ءَ سیادی داروکیں مردمانی زھرشانی ءَ دو روچ اِنت که برجاه اِنت ، زھرشانی کنوک گوں ایمنی سیمسر ءِ زوت پچ کنگ ءِ لوٹ ءَ کنگ اَنت دانکه مردمانی کار ءُ بار شر به بیت۔
آئی ءَ گوشتگ که ریاستی ادارھاں زھرشانی ءِ سر ءَ زوراکی کنگ ءِ جھد کرتگ ، چه ریاستی کارمندانی نیمگ ءَ زھرشانی ءِ سر ءَ لٹ ءُ شاپ ءُ زور ءِ کارمرز کنگ ءِ ھال اِنت ، بلے چه ایشی ءَ ابید زھرشانی کنوکانی لوٹ برجاه اَنت ءُ آیاں ریاستی زوراکی ءِ بگیری ءَ گھگیری ءِ برجاه دارگ ءِ کول کرتگ. اے ایوک ءَ سیمسر ءِ بندش نه اِنت بلکیں بلوچستان ءِ مردمانی کار ءُ روزگار ءِ سر ءَ بندش جنگ ءِ یک مھکمیں شوربندی یے ءِ بھر اِنت ، پیسر ءَ اے دمگ کرپشن ءُ پدمنتگی ءِ آماچ بیتگ نوں گوں سیمسر ءِ بند کنگ ءَ مردمانی جیڑھ گیش بیتگ اَنت.
