بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ بی وائی سی گوستگیں روچ ءَ گرینڈ الائنسءِ ایمنیں زھرشانی ءِ سر ءَ ریاست ءِ نیمگ ءَ بیتگیں ناشریں زوراکی، لٹ ءُ کٹ، ارسی گیس جنگ، تیرگواری ءُ درزنانی کچ ءَ نوکرانی دزگیری نہ تھنا بلوچستان ءَ لس مردمانی بگیریءَ ریاستی زوراکی سرپد بیت بلکیں بلوچستان ءِ مھلوک ءِ بگیری ءَ ریاستی ناشرکاری لیک ایت۔
آئی ءَ گوشتگ کہ اے زوراکی تھنا یک بھرگے ءِ سر ءَ نہ اِنت بلکیں بلوچستان ءِ باسما ءُ لٹ ءُ پلی نزام ءِ بگیری ءَ چست بیتگیں ھمک مردم ءِ سر ءَ ارش اِنت، ریاست پہ وتی بنیادی ھکاں توار چست کنوکیں مردماں اوپار کرت نہ کنت، آ نہ تھنا زوراک اِنت بلکیں مھلوک ءِ دژمن اِنت۔
آئی ءَ گوشتگ کہ استاد، پروپیسرءُ سرکاری نوکرانی زندان ءَ بندیگ کنگ ھمے گپ ءِ منانک اِنت کہ انوگیں سرکار مھلوک ءِ نہ بلکیں زوراکی ءُ ناشرکاری ءِ جھگیر اِنت۔ اے ھما سرکار اِنت کہ چہ ایشی ءَ پیش ھم مھلوک گژن، بے روزگاری، گرانھادی ءُ ادارھی بربادی ءِ نیمگ ءَ تیلانک داتگ ءُ نوں کار کنوکیں بھرگ پہ وتی ھکاں ڈن ءَ درکپتگ گڑا آیانی سر ءَ ریاستی زوراکی برجاہ اَنت۔
آئی ءَ گوشتگ کہ ما ھمے سرپد بہ ایں کہ اے زوراکی ءُ ناشرکاریانی گنتریں دروشم اِنت۔ بلوچ یکجھتی کمیٹی گرینڈ الائنس ءِ درسیں لوٹانی پلہ مرزی ءَ کنت، بلوچستان ءِ نوکرانی گون ءَ اوشتاتگ ءُ چہ بلوچستان ءِ مردماں ھمے لوٹ ءَ کنت کہ اے زوراکیانی بگیری ءَ زھرشانی ءُ توار چست بہ کن اَنت۔ درسیں دزگیر بیتگیں نوکر بزاں استادانی زوتیں آجوئی ءِ لوٹ ءَ بہ کن اَنت۔
