کراچی: زور بیگواھیں ڈاکٹر دین مھمد ءِ کھول ءَ وتی شنگ کرتگیں جارے ءَ گوشتگ کہ ڈاکٹر دین مھمد بلوچ ءِ بیگواھی ءَ شانزدہ سال سرجم بوگ ءِ درگت ءَ 29 جون ءَ کراچی پریس کلب ءَ مراگشے برجم دارگ بوگ ءَ اِنت۔ دانکہ اے مراگش ءَ ڈاکٹر دین مھمد ءِ بیگواھی ءِ کیس ءُ زوربیگواھیانی جیڑہ دیم ءَ آرگ بیت۔
ڈاکٹر دین مھمد ءِ کھول ءَ چہ درسیں انسانی ھکانی کارکن، اھوالکار، سول سوسائٹی ءِ کارکناں ھوار گوں درسیں بھرگاں سْیادی داروکیں مردماں لوٹ کرتگ کہ اے مراگش ءَ بھر بہ زور اَنت ءُ پہ انساپ ءِ جھد ءَ مئے ھمراہ داری ءَ بہ کن اَنت۔
