بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سے سرمچار شال، کلات ءُ سیاھیجی ءَ زورگریں پاکستانی پوج ءِ گون ءَ میڑاں شھید بیتگ۔ شھید بیتگیں سنگتانی تہ ءَ سنگت جمشید، سنگت نوروز ءُ سنگت منور ھوار اَنت۔
آئی ءَ گوشتگ کہ 22 جون ءَ شال ءِ ھند ڈگاری ءَ بی ایل اے ءِ یک گشتی ٹول یے گوں زورگریں پاکستانی پوج ءَ ھما وھد ءَ دیم پہ دیم بیتگ که آ ھمے ھند ءَ لشکرکشی ءِ جھد ءَ بیتگ اَنت۔ زورگریں پوج ءُ سرمچارانی میان ءَ دیم پہ دیمی میڑے بندات بیتگ کہ داں دیر ءَ برجاہ بیتگ۔ میڑاں زورگریں پوج ءِ باز کارمند مرتگ ءُ ٹپی بیتگ ، بی ایل اے ءِ سرمچار جمشید پنام رزوان شھید بیتگ۔
جارکش ءَ گوشتگ کہ ھمے روچ ءَ کلات ءِ ھند کوھک ءَ بی ایل اے ءَ زورگریں پاکستانی پوج ھما وھد ءَ گوں ترندیں ارش ءَ نشانگ کرتگ کہ آ پہ پوجی زوراکی ءِ نیت ءَ روگ ءَ بیتگ۔ سرمچاراں زورگریں پوج ءِ موٹر سائیکل ءُ گاڑیانی کاروان گوں چیر کرتگیں شورھاں نشانگ کرتگ ءُ تاوان داتگ۔
آئیءَ گوشتگ کہ بیگاہ ءَ بی ایل اے ءِ سرمچارانی دو ٹولیاں زورگریں پوج ءِ پیادگیں کارمند یک نالی یے ءِ تہ ءَ چہ دو نیمگاں انگر کرتگ ءُ نشانگ کرتگ۔ ایشی آسر ءَ زورگریں پوج ءِ شش کارمند جاھی مرتگ ءُ باز ٹپی بیتگ۔ زورگریں پوج ءِ گون ءَ داں ادارے ءَ برجاھیں میڑ ءَ بی ایل اے ءِ سرمچار نوروز پنام نجیب شھید بیتگ۔
جارکش ءَ گوشتگ کہ 20 جون ءَ دشت لنگاسی ءَ بی ایل اے ءِ سرمچار گوں زورگریں پوج ءَ ھما وھد ءَ دیم پہ دیم بیتگ اَنت کہ آ گل ءِ کارے ءَ سپر ءَ بیتگ اَنت۔ زورگریں پوج ءُ سرمچارانی میان ءَ دیم پہ دیمی میڑ ءَ زورگریں پوج ءَ تاوان بیتگ۔ سنگت منور گوں ٹپی ئیں جاوراں زورگریں پوج ءِ گون ءَ میڑ ءَ شھید بیتگ۔
آئی ءَ گوشتگ کہ سنگت جمشید پنام رزوان ء نورجان ساتکزھی شال ڈگاری ءِ جاہ منند اِنت۔ سنگت جمشید 2019 ءَ بی ایل اے ءَ ھوار بیتگ ، آئی ءَ شھری نیٹورک ءَ کار کرتگ ءُ داں بازیں وھد ءَ دژمن تاوان داتگ۔ رند ءَ آ 2014 ءَ کوہ ءَ اتکگ۔ آئی بولان ءُ شال ءَ وتی کرد پیلو کرتگ۔
جارکش ءَ گوشتگ کہ شھید سنگت نوروز پنام کنگ نجیب ء میر مھمد شاھوانی مستونگ ءِ ھند سُنگر ءِ جاہ منند اِنت۔ آ 2023 ءَ بی ایل اے ء ھوار بیتگ ءُ مستونگ، ناگاھو ءُ کلات ءَ جنگاں بھر زرتگ۔
آئی ءَ گوشتگ کہ شھید سنگت منور بیگ پنام میرک ء بیگ کیچ ءِ ھند دشت بلنگور بازار کلیرو ءِ جاہ مند اِنت۔ آ یک سالے پیش بی ایل اے ءَ ھوار بیتگ ءُ سیائیجی ءُ دشت ءِ جنگاں بھر زرتگ۔
جیھند بلوچ ءَ گوشتگ کہ شھیدانی ھون سرڈگارءِ آجوئی ءِ بنیاد اَنت آ ھمک آھوکیں پدریچ ءِ رھشونی ءَ کن اَنت۔ ما اے گرانکدریں سرمچارانی دیمونیاں کدی بے ھال نہ کن ایں ءُ آیانی راہ مئے جھد ءِ راہ اِنت۔
