چہ بلوچ نیشنل موومنٹ ( بی این ایم ) ءِ نیمگ ءَ مرچی لندن ءِ شھر ٹن ڈاؤننگ اسٹریٹءَ مزن وزیر ءِ گس ءِ دیم ءَ میان استمانی آزاردھی روچ ءُ بی این ایم ءِ سروک ڈاکٹر دین مھمد ءِ زوریں بیگواھی ءِ شانزدہ سال سرجم بیگ ءِ درگت ءَ زھرشانی کنگ بوتگ۔
زھرشانی ءَ بی این ایم ءِ بنجاھی کستریں کمک کارگشاد ھسن دوست ءَ ھوار بی این ایم ءِ باسکاں بازیں کچے ءَ بھر زرتگ ۔ زھرشانی کنوکیں مردماں زور بیگواھیں مردمانی اکس دستاں بیتگ اَنت کہ آیاں پاکستان ءِ زوراکیانی بگیری ءَ اوگام جتگ ءُ بیگواھیں بلوچانی آجوئی ءِ لوٹ کرتگ۔
آیاں بلوچستان ءَ زوریں بیگواھیانی بابت ءَ گپ جتگ ءُگوشتگ کہ بلوچستان ءِ تہءَ مردم چہ ریاستی ادارھانی دست ءَ سالانی سال بیگواہ اَنت۔ ریاست ھمے سرپد بیت کہ ما آیاں اے وڑ ءَ بیگواہ کناں بوت کنت مردم آیاں بے ھال بہ کن اَنت۔ ما چہ وتی ارادہ، راجی زرمبشت ءِ پارست ءَ وتی مردماں بیگواھی ءَ نیل ایں۔
آیاں گوشتگ کہ اگاں پاکستان مئے مردماں داں سد سال ءَ بیگواہ بہ کنت بلے بلوچ ءِ پسگ چہ سد سال ءَ پد ھم وتی بیگواھیں مردماں بے ھال نہ کن اَ نت ءُ پہ آیانی آجوئیءَ وتی جھد ءَ برجاہ دار اَنت۔ ریاست ءَ نوں بلوچ ءِ ھمے گپ زانگ ءُ مارگ لوٹ ایت۔
آیاں گوشتگ کہ بلوچستان ءَ پاکستان ءِ ادارہ انسانی ھکاں لگتمال کنگءَ اَنت ءُ اود ءَ نامگپتیں انسانی ھکانی ادارہ درسیں زوراکیاں گندگ ءُ وت ءَ بے توار کنگ ءَ اَنت، بلے بی این ایم ءِ نیمگ ءَ دری جتائیں ڈیھاں زھرشانی ءُ جھد برجاہ اِنت دانکہ آ میان استمانی ادارھانی دلگوش ءَ بلوچستان ءِ ناگیگیں جاورانی نیمگ ءَ بہ کنت ءُ میان استمانی ادارہ بلوچستان ءَ پہ مردمی ھکانی لگتمالی ءَ پاکستان ءَ جست بہ کن اَنت۔
