انسانی ھکانی میان استمانی گل ایمنسٹی انٹر نیشنل ءَ ھیبر پکتونواہ ءَ انوگیں ڈرون ارشانی تیزی ءُ اود ءِ مردم بزاں زھگانی کوشانی سر ءَ بژن درشان کرتگ۔
ایمنسٹی انٹر نیشنل زرباری ایشا ءِ نائب ریجنل ڈائریکٹر ایزابل لاسے ءَ ھیبرپکتونواہ ءَ ھمے سال ءَ بیتگیں ڈرون ارشاں پنچ زھگاں ھوار ھبدہ مردمانی کوش ءِ پژدر ءَ گوشتگ کہ پاکستان سرکار پہ ھیبرپکتوانواہ ءِ مردمانی جان ءُ مال ءِ پھریزگ ءَ گامگیج زورگ ءَ بے سوب بیتگ۔ استان ءَ ڈرون ارشانی کچ یکشل ءَ گیش بوگ ءَ اِنت ءُ 20 جون ءَ یک ارشے ءَ زھگے ءِ بیران بوگ ءَ ترس گیشتر کرتگ۔
درشان ءَ گوشگ بیتگ کہ چہ ڈرون ءُ کواڈکاپٹرانی رد ءَ اے وڑیں ارشانی آسر ءَ مردم کشگ بوگ ءَ اَنت اے میان استمانی راھبند ءِ تچک ءَ بگیری اِنت۔
آئی ءَ گوشتگ کہ اگاں پاکستان سرکار گیشتر اے ارشانی زمہ واری ءَ نہ زورایت گڑا آئی سر ءَ المی اِنت کہ ھمک ارش ءَ پد زوت شریں وڑے ءَ پٹءُ پول بہ کنت۔ ھما مردم کہ اے ارشانی زمہ وار اَنت آیاں آمیدگس ءِ رد ءَ جست بہ کنت۔
