شال: وائس پار بلوچ مسنگ پرسنز ءِ سرکماش نسراللہ بلوچ ءَ ماں رسانکدر ءَ شنگ کرتگیں درشانے ءَ گوشتگ کہ زوربیگواھیں سید انس شاہ ءُ سھیل اھمد ءِ کھول وائس پار بلووچ مسنگ پرسن ءِ گدان ءَ اتکگ ءُ آیانی زوریں بیگواھی ءِ کیس گل ءِ کِر ءَیاداشتگ کرتگ۔
نسراللہ ءِ گوشگ اِنت کہ سید امیر شاہ ءَ گوشتگ کہ آئی برات سید انس شاہ ء سید نور شاہ زانشجاہ ءِ نودربر اِنت ءُ کلات ءِ جھمنند اِنت۔ 13 جون ءَ آ وتی گس ءِ مردماں چہ کلات ءَ شالءَ برگ ءَ بوتگ کہ نیمروچ ءِ ادار یک ءُ نیم ءِ نزیک ءَ سی ٹی ڈی ءُ چیریں ادارھانی کارمنداں مستونگ ءِ ھند کڈ کوچگ ءَ گاڑی داشتگ ءُ سید انس شاہ گوں وت برتگ۔ وھدے کہ گس ءِ مردماں چہ سی ٹی ڈی ءِ کارمنداں جست گپتگ کہ سید انس شاہ ءَ کجام برگ ءَ اِت؟ آیاں گوشتگ کہ آئی جست ءُ پرس کن ایں پد ءَ یل دئے ایں۔ بلے ھپت روچ گوستگ نہ سید انس شاہ یل کنگ بوتگ ءُ نہ کہ آئی بابت ءَ سرپدی دیگ بوتگ۔
نسراللہ ءِ گوشگ کہ ایڈوکیٹ سگیر اھمد ءَ وی بی ایم پی ءِ کر ءَ وتی برات ءِ کیس یاداشت کرتگ ءُ گوشتگ کہ آئی برات سھیل اھمد ء زھیر اھمد یک دکاندارے ءُ آ باڑہ ءِ سر ءَ پہ سوراں اسپیکر ءُ آدگہ چیز بارت ءُ سر کنت وتی گس ءَ والینگ ءَ انت۔ آ 12 جون ءِ شپ ءِ ادار یازدہ ءَ سی ٹی ڈی ءُ آدگہ پوجی کارمنداں چہ ھاران ءَ کلہ چاراہ بازار ءَ درکانودی آوار جتگ ءُ بیگواہ کرتگ۔ آئی زوربیگواھی ءَ ھشت روچ ءِ گوزگ ءَ ابید سھیل ءِ بابت ءَ ھچ وڑیں سرپدی دیگ نہ بوتگ۔ چہ ایشی سوب ءَ کھول سکا جنجالانی دیمپان انت۔
نسراللہ ءَ گوشتگ کہ چہ گل ءِ نیمگ ءَ سید انس شاہ ءُ سھیل اھمد ءِ کھول ءَ دلجمی داتگ کہ آیانی کیساں پہ زوربیگواھیں مردماں جوڑ کرتگیں کمیشن ءُ دمگی سرکار ءَ سر کنت ءُ پہ آیانی آجوئی ءَ ھمک جاہ ءَ توار چست کنت۔
آئی ءَ پاکستانی پوج ءِ دست ءَ زوربیگواہ کرتگیں سید انس شاہ ءُ سھیل اھمد ءِ درکانودی دزگیری ءَ پد بیگواھی ایر جتگ ءُ چہ سرکار ءَ لوٹ کرتگ کہ دوئیں ورناھانی زوربیگواھی ءَ گامگیج بہ زور ایت ءُ پہ سید انس شاہ ءُ سھیل اھمد ءِ کھول ءَ ڈیھ ءِ کانود ءِ رد ءَ انساپ دیگ ءَ وتی کرد ءَ پیلو بہ کنت ءُ آئی ءَ چہ اے جنجلاں در بہ کنت۔
