بلوچ یکجھتی کمیٹی ءِ نیمگ ءَ بلوچ چکچینی ءِ بگیری ءَ ھزادار، وڈ، نال ءُ ناگ ءَ زھرشانی روانک کشگ بوتگ اَنت۔ زھرشانیاں مردماں بازیں کچے ءَ بھر زرتگ۔
زھرشانیاں زور بیگواھیں مردمانی کھول، سیاسی، چاگردی ءُ مردمی ھکانی کارکن، نودربر، جنین ءُ زھگ جتائیں بھرگاں سیادی داروکیں مردماں بھر زرتگ
۔
زھرشانی کنوکیں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت، پلے کارڈانی سر ءَ جتائیں اوگام نبشتہ بوتگ۔ زھرشانی کنوکیں مردماں زوریں بیگواھی ءُ دروگیں میڑاں زور بیگواھیں مردمانی ناھکیں کوش ءُ اسلام آباد ءَ برجاھیں زھرشانی ءِ پلہ مرزی ءَ اوگام جتگ۔
دوشمبے ءِ روچ ءَ چہ گریشگ ءَ بازیں کچے ءَ مردم پرپٹانی سر ءَ روانک ءَ درکپتگ اَنت ءُ نال ءَ شتگ اَنت۔
یات بہ بہ اِت کہ اے بلوچ یکجھتی کمیٹی ءِ نیمگ ءَ سیمی پیز ءِ زھرشانیانی درچ اِنت بلوچستان ءِ جتائیں ھند ءُ دمگاں برجاہ اِنت۔ ھمک روچ سے چار جاہ ءَ زھرشانی کنگ بوگ ءَ اِنت۔
