ایران ءِ اسرائیل ءِ سر ءَ ارش ءَ چاردہ اسرائیلی مرتگ ءُ 200 ءَ گیش ٹپی بیتگ۔ ایران ءَ دہ اسرائیلی ڈرون جتگ ءُ دور داتگ۔
جھانی ھالانی رد ءَ ایران ءَ اسرائیل ءِ سر ءَ سد میزائل آس داتگ کہ آ اسرائیلی شھر ھیپہ ءَ ترک اِتگ اَنت۔ آس داتگیں میزائل ھائپر سانک ءُ بیلسٹک میزائل بیتگ اَنت۔ سیھونی پوج ءَ شھری کڈن کرتگ اَنت کہ آ وت ءَ مھکمیں بندراں بدار اَنت ءُ ڈن ءَ در مہ کپ اَنت۔
ایرانی رسانکدر ءِ رد ءَ ھاتم الانبیا ائیرڈیپنس ءِ کمانڈر ءَ گوشتگ کہ یک ادارے ءِ میان ءَ ایران ءِ جتائیں شھراں 10 اسرائیلی ڈرون جتگ ءُ دور داتگ۔
اے بابت ءَ اسرائیلی سرکار ءَ ھچ نہ گوشتگ۔
چوش کہ چہ ایشی ءَ پیش ایرانی رسانکدر ءِ نیمگ ءَ سے اسرائیلی ایپ 35 بالی گراب ءِ جنگ ءُ دور دیگ ءُ یک جنین پائلٹے ءِ دزگیر کنگ ءِ گپ کنگ بیتگ اَت گڑا اسرائیلی پوج ءَ اے گپ دروگ لیک اتگ اَنت۔
اسرائیلی ارش ءِ بابت ءَ ایران ءِ دری کارانی وزیر اباس ارکچی ءَ چہ تھران ءَ پریس کانپریس کرتگ ءُ گوشتگ کہ ایران ءِ سر ءَ اسرائیل ءِ ارشاں امریکہ تچک ءَ ھوار اِنت ءُ ایشی آسر سکا ھراب بیت۔
آئی ءِ گوشگ اِنت کہ امریکہ ءِ رزا ءَ ابید اسرائیل ارش کرت نہ کنت ءُ اے ارش ءَ امریکہ ءِ دزمنانجنی ءِ پکائیں منانک ھست اَنت۔
چوش کہ اے بابت ءَ امریکہ ءِ گوشگ اَت امریکہ اے ارش ءَ ھوار نہ اِنت۔
اے بابت ءَ امریکہ ءِ مھتر ڈونلڈ ٹرمپ ءَ وتی درشانے ءَ ایران کڈن کرتگ ءُ گوشتگ کہ اگاں امریکہ ءِ سر ءَ ارش کرت گڑا منی پوج گوں وتی سرجمیں زور ءَ پسو ءَ دنت۔
آئی ءَ وتی چاگردی رسانکدر ءِ اکاونٹ ءَ اسرائیل ءِ ایران ءِ سر ءَ ارش ءِ بابت ءَ گوشتگ کہ اے ارش ءَ امریکہ ءِ ھچ وڑیں کرد نیست۔ اگاں ایران ءِ نیمگ ءَ ارش کنگ بوت گڑا امریکہ ءِ پوج گون وتی سرجمیں توان ءَ انچیں ارش کنت کہ پیسر ءَ کدی ھم نہ دیستگ۔
ایران ءُ اسرائیل ءِ جنگ ءِ بابت ءَ اسرائیلی پوج ءَ وتی شنگ کرتگیں درشانے ءَ گوشتگ کہ اسرائیل ءَ ایران ءِ سر ءَ ارشانی میان ءَ پاسدار انکلاب ءَ ھوار ایرانی پوج ءِ بیست ءَ گیش مزنیں پوجی کمانڈر نشانگ کرتگ اَنت۔
